Azərbaycan dili xalqımızın tarixi yaddaşını, milli kimliyini, mədəniyyətini və mənəvi dəyərlərini yaşadan ən mühüm sərvətlərdən biridir. Hər bir xalqın varlığını və milli birliyini qoruyub saxlayan əsas amillərdən biri onun ana dilidir. Dil yalnız ünsiyyət vasitəsi deyil, həm də xalqın tarixini, adət-ənənələrini, milli düşüncə tərzini və zəngin mədəni irsini gələcək nəsillərə ötürən müqəddəs körpüdür.

Azərbaycan xalqı əsrlər boyu müxtəlif tarixi sınaqlardan keçsə də, öz ana dilini qorumağı və yaşatmağı bacarmışdır. Azərbaycan dili qədim türk dilləri ailəsinə mənsub olmaqla zəngin söz ehtiyatına, ahəngdar səslənməyə, dərin ifadə imkanlarına malikdir. Dünya xalqları arasında öz gözəlliyi, zənginliyi və melodikliyi ilə seçilən Azərbaycan dili bu gün müstəqil dövlətimizin rəsmi dili kimi inkişaf edir.

Ümummilli Lider Heydər Əliyevin Azərbaycan dilinin inkişafı istiqamətində gördüyü xidmətlər xüsusi əhəmiyyət daşıyır. Məhz onun təşəbbüsü ilə Azərbaycan dilinin dövlət dili kimi mövqeyi möhkəmləndirilmiş, ana dilinin qorunması dövlət siyasətinin əsas istiqamətlərindən birinə çevrilmişdir. 2001-ci il 9 avqust tarixli Fərmana əsasən hər il 1 avqust "Azərbaycan əlifbası və Azərbaycan dili günü" kimi qeyd edilir.

Latın qrafikalı Azərbaycan əlifbasına keçid ölkəmizin müstəqillik tarixində mühüm hadisələrdən biri olmuşdur. Bu addım milli-mənəvi dəyərlərimizin qorunmasına, beynəlxalq informasiya məkanına inteqrasiyaya və gənc nəslin müasir dünya ilə daha sıx əlaqə qurmasına geniş imkan yaratmışdır.

Bu gün Azərbaycan dili elm, təhsil, ədəbiyyat, mədəniyyət, media və informasiya texnologiyalarının bütün sahələrində uğurla istifadə olunur. Elektron resursların, dərsliklərin, lüğətlərin və rəqəmsal platformaların Azərbaycan dilində hazırlanması dilimizin inkişafına mühüm töhfə verir.

Xüsusilə gənc nəslin ana dilinə hörmət ruhunda tərbiyə olunması böyük əhəmiyyət kəsb edir. Hər bir vətəndaş Azərbaycan dilində düzgün danışmalı, düzgün yazmalı, onu yad sözlərin təsirindən qorumağa çalışmalıdır. Dilimizi qorumaq hər birimizin vətəndaşlıq borcudur.

Prezident İlham Əliyev də Azərbaycan dilinin saflığının qorunmasını, dövlət dilinin tətbiqinin genişləndirilməsini daim diqqət mərkəzində saxlayır. Dövlət tərəfindən qəbul olunan proqramlar və görülən tədbirlər ana dilimizin inkişafına xidmət edir.

1 Avqust – Azərbaycan əlifbası və Azərbaycan dili günü bizə bir daha xatırladır ki, ana dili xalqın milli sərvəti, dövlətçiliyimizin əsas dayaqlarından biridir. Gəlin hamımız dilimizi sevək, onu qoruyaq, düzgün istifadə edək və gələcək nəsillərə ən qiymətli irsimiz kimi ötürək.

Xocalı rayon gənci Ziya Əliyev.