Dünya Azərbaycanlılarının Həmrəyliyi ideyası Azərbaycan xalqının tarixi yaddaşında, milli kimliyində və dövlətçilik düşüncəsində xüsusi yer tutur. Bu ideya əsrlər boyu müxtəlif imperiyaların tərkibində yaşamaq məcburiyyətində qalan, lakin milli mənsubiyyətini və mənəvi dəyərlərini qoruyub saxlayan azərbaycanlıların bir millət kimi formalaşmasının məntiqi nəticəsidir. Müasir dövrdə bu həmrəylik yalnız emosional bağlılıq deyil, eyni zamanda siyasi, mədəni və ideoloji güc mənbəyi kimi çıxış edir.

Milli həmrəyliyin dövlət səviyyəsində möhkəmləndirilməsi Ümummilli Lider Heydər Əliyevin tarixi xidmətləri ilə bilavasitə bağlıdır. Onun müəyyən etdiyi azərbaycançılıq ideologiyası bütün dünyada yaşayan azərbaycanlıları ortaq dil, mədəniyyət və milli maraqlar ətrafında birləşdirən əsas platformaya çevrildi. Həmrəyliyin rəsmi bayram kimi təsis edilməsi bu ideyanın davamlı və sistemli xarakter almasını təmin etdi və diaspor quruculuğunu dövlət siyasətinin mühüm istiqaməti kimi formalaşdırdı.

Müstəqil Azərbaycanın inkişafı ilə paralel olaraq dünya azərbaycanlılarının fəaliyyət dairəsi də genişlənmişdir. Prezident İlham Əliyevin rəhbərliyi ilə həyata keçirilən siyasət diaspor təşkilatlarının daha çevik, koordinasiyalı və məqsədyönlü fəaliyyət göstərməsinə şərait yaratmışdır. Bu gün xaricdə yaşayan azərbaycanlılar ölkəmizin milli maraqlarının müdafiəsində, Azərbaycan həqiqətlərinin beynəlxalq ictimaiyyətə çatdırılmasında və qlobal informasiya məkanında obyektiv mövqenin formalaşdırılmasında fəal rol oynayırlar.

Xüsusilə 44 günlük Vətən müharibəsi dövründə dünya azərbaycanlılarının nümayiş etdirdiyi birlik və həmrəylik milli gücün real təzahürü oldu. Dünyanın müxtəlif ölkələrində keçirilən aksiyalar, media platformalarında aparılan maarifləndirmə fəaliyyəti və siyasi dairələrlə qurulan əlaqələr Azərbaycanın haqq səsinin eşidilməsinə mühüm töhfə verdi. Bu proses bir daha sübut etdi ki, milli birlik yalnız daxili deyil, eyni zamanda beynəlxalq miqyasda da strateji əhəmiyyət daşıyır.

Həmrəyliyin möhkəmlənməsində mədəniyyət və dil amili xüsusi rol oynayır. Azərbaycan dili, milli musiqi, ədəbiyyat və adət-ənənələr dünya azərbaycanlılarını bir-birinə bağlayan mənəvi körpü rolunu oynayır. Xaricdə fəaliyyət göstərən mədəniyyət mərkəzləri, həftəsonu məktəbləri və ictimai təşəbbüslər gənc nəslin milli dəyərlər ruhunda tərbiyə olunmasına xidmət edir. Bu da milli kimliyin qorunmasını və gələcək nəsillərə ötürülməsini təmin edir.

Postmüharibə dövründə dünya azərbaycanlılarının qarşısında duran vəzifələr daha da məsuliyyətlidir. Azad edilmiş ərazilərin bərpası prosesinin beynəlxalq ictimaiyyətə düzgün təqdim olunması, regionda yaranmış yeni reallıqların qəbul etdirilməsi və Azərbaycanın sülhə yönəlik təşəbbüslərinin dəstəklənməsi diaspor fəaliyyətinin əsas istiqamətlərindən birinə çevrilmişdir. Bu mərhələdə vahid mövqe və koordinasiyalı fəaliyyət milli maraqların qorunmasının əsas şərtidir.

Nəticə etibarilə, Dünya Azərbaycanlılarının Həmrəyliyi Azərbaycan xalqının tarixi iradəsinin, milli şüurunun və dövlətçilik təfəkkürünün təzahürüdür. Bu həmrəylik Azərbaycan dövlətinin güclənməsinə, beynəlxalq nüfuzunun artmasına və milli maraqların qlobal miqyasda müdafiəsinə xidmət edir. Birlikdən doğan bu güc Azərbaycanı daha parlaq gələcəyə aparan əsas amillərdən biri olaraq qalır.

Xocalı rayon ziyalısı Şahnaz Əliyeva