15 İyun – Milli Qurtuluş Günü: Azərbaycanın Xilas Tarixi.

“Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır”.

— Ümummilli Lider Heydər Əliyev

Azərbaycan xalqının müasir tarixində xüsusi əhəmiyyətə malik olan 15 İyun – Milli Qurtuluş Günü dövlətimizin taleyində dönüş nöqtəsi kimi qiymətləndirilir. Bu gün Azərbaycanın müstəqilliyinin qorunub saxlanılması, dövlətçiliyin möhkəmləndirilməsi və ölkənin gələcək inkişaf yolunun müəyyənləşdirilməsi baxımından mühüm tarixi hadisədir.

1987-ci ilin oktyabrında Ulu Öndər Heydər Əliyevin Sovet İttifaqı Kommunist Partiyası Mərkəzi Komitəsinin Siyasi Bürosundakı vəzifələrindən istefa verməsindən qısa müddət sonra erməni millətçiləri Dağlıq Qarabağın Azərbaycandan ayrılaraq Ermənistana birləşdirilməsi tələbi ilə çıxış etdilər. Bununla da Azərbaycan xalqının üzləşdiyi ağır sınaqlar dövrü başladı. Sonrakı illərdə ölkədə baş verən siyasi qarışıqlıqlar, Ermənistanın hərbi təcavüzü və daxili sabitliyin pozulması Azərbaycanın gələcəyini ciddi təhlükə altında qoydu.

1991-ci ildə dövlət müstəqilliyini bərpa edən Azərbaycan çox mürəkkəb vəziyyətlə üzləşmişdi. Dövlət idarəetməsindəki problemlər, iqtisadi böhran, silahlı qarşıdurmalar, müxtəlif bölgələrdə separatçılıq meyllərinin güclənməsi ölkədə anarxiya və özbaşınalığın hökm sürməsinə səbəb olmuşdu. Vətəndaş müharibəsi təhlükəsi getdikcə artır, torpaqlarımız işğal olunur, dövlət müstəqilliyi real təhlükə ilə qarşı-qarşıya qalırdı.

1993-cü ildə ölkədə yaranmış dərin siyasi böhran Azərbaycanı parçalanma həddinə çatdırmışdı. Məhz belə bir zamanda xalq çıxış yolunu böyük dövlət xadimi Heydər Əliyevin hakimiyyətə qayıdışında görürdü. Azərbaycanın müxtəlif bölgələrindən gələn çağırışlar və xalqın təkidli tələbi nəticəsində Heydər Əliyev 1993-cü il iyunun 9-da Bakıya qayıtdı. O, ölkədə baş verən hadisələri diqqətlə təhlil edərək dövlətçiliyin xilası naminə qətiyyətli addımlar atmağa başladı.

1993-cü il iyunun 15-də Heydər Əliyevin Azərbaycan Respublikası Ali Sovetinin Sədri seçilməsi ölkənin taleyində yeni bir mərhələnin başlanğıcı oldu. Həmin gün Azərbaycan tarixində Milli Qurtuluş Günü kimi əbədiləşdi. Ulu Öndərin siyasi hakimiyyətə qayıdışı ilə ölkədə sabitliyin bərpası, dövlət institutlarının möhkəmləndirilməsi, qanunçuluğun təmin edilməsi və milli birliyin yaradılması istiqamətində mühüm işlər görüldü.

Heydər Əliyevin uzaqgörən siyasəti nəticəsində qısa müddət ərzində ölkədə ictimai-siyasi sabitlik təmin olundu, vətəndaş qarşıdurmasının qarşısı alındı, dövlət müstəqilliyi qorundu. Azərbaycan beynəlxalq aləmdə etibarlı tərəfdaş kimi tanınmağa başladı, iqtisadi inkişafın əsasları yaradıldı və gələcək uğurların təməli qoyuldu.

Milli Qurtuluş Günü Azərbaycan xalqının birliyinin, dövlətçilik ənənələrinin və milli həmrəyliyinin rəmzidir. Bu gün təkcə keçmişə nəzər salmaq deyil, həm də müstəqil Azərbaycanın keçdiyi inkişaf yolunu dəyərləndirmək baxımından mühüm əhəmiyyət daşıyır. Ümummilli Lider Heydər Əliyevin xilaskarlıq missiyası nəticəsində Azərbaycan dövlətçiliyi qorunub saxlanılmış, ölkəmiz sabitlik və tərəqqi yoluna qədəm qoymuşdur.

Bu gün Prezident İlham Əliyevin rəhbərliyi altında Ulu Öndərin siyasi kursu uğurla davam etdirilir, Azərbaycan daha da güclənərək regionun aparıcı dövlətinə çevrilir. Milli Qurtuluş Günü xalqımızın yaddaşında dövlətçilik tariximizin ən şanlı və taleyüklü səhifələrindən biri kimi daim yaşayacaqdır.

Xocalı rayon ziyalısı Xalidə Əmraslanova.