2026-cı il aprelin 22-də Azərbaycan Respublikasının Prezidenti İlham Əliyev ilə Latviya Respublikasının Prezidenti Edqars Rinkeviçs arasında Bakıda keçirilən görüş və mətbuata verilən bəyanatlar iki ölkə münasibətlərinin keyfiyyətcə yeni mərhələyə qədəm qoyduğunu bir daha nümayiş etdirdi. Dövlət başçılarının həm təkbətək, həm də geniş tərkibdə apardıqları müzakirələr ikitərəfli gündəliyin geniş spektrini əhatə etməklə yanaşı, beynəlxalq və regional əhəmiyyətli məsələlər üzrə mövqelərin uzlaşdırılması baxımından da mühüm əhəmiyyət daşıyır.

Prezident İlham Əliyevin vurğuladığı kimi, Azərbaycan və Latviya arasında doqquz il əvvəl imzalanmış Strateji Tərəfdaşlıq haqqında Bəyannamə münasibətlərin möhkəm hüquqi-siyasi təməlini formalaşdırıb. Bu çərçivə əsasında son illərdə əməkdaşlıq ardıcıl şəkildə inkişaf etdirilib və hazırda tərəflər qarşılıqlı əlaqələri daha da dərinləşdirmək üçün geniş imkanlara malikdir. Səfər zamanı əldə olunan razılaşmalar, aparılan müzakirələr və imzalanmış sənədlər bu potensialın reallaşdırılması istiqamətində konkret addımların atıldığını göstərir.

İkitərəfli iqtisadi əməkdaşlıq məsələləri görüşlərin əsas prioritetlərindən biri olub. Qarabağ bölgəsində, o cümlədən Şuşada keçirilmiş Birgə Hökumətlərarası Komissiyanın iclasının nəticələri, həmçinin Bakıda təşkil olunan biznes-forum tərəflər arasında iqtisadi əlaqələrin intensivləşdirilməsi üçün mühüm platforma rolunu oynayır. Hər iki ölkədən geniş işgüzar dairələrin iştirakı ilə keçirilən bu tədbirlər qarşılıqlı sərmayələrin təşviqi, birgə istehsalın qurulması və yeni əməkdaşlıq istiqamətlərinin müəyyənləşdirilməsi baxımından xüsusi əhəmiyyət kəsb edir. Prezident İlham Əliyevin qeyd etdiyi kimi, Azərbaycan sərmayədarları həm dövlət, həm də özəl sektor səviyyəsində belə təşəbbüslərə hazırdır və qarşılıqlı investisiyalar yaxın gələcəkdə konkret iqtisadi nəticələrə çevrilə bilər.

Eyni zamanda, tərəflər ticarət dövriyyəsinin artırılması zərurətini xüsusi vurğulayaraq bu sahədə mövcud potensialın hələ tam istifadə olunmadığını qeyd ediblər. Bu baxımdan, biznes-forumun praktiki müqavilələrlə nəticələnməsi və iqtisadi əməkdaşlığın real layihələr üzərində qurulması gözlənilir. Bununla yanaşı, tərəflər şirkətlərin informasiya əlçatanlığını artırmaq məqsədilə planlar, proqramlar və investisiya imkanları barədə mütəmadi məlumat mübadiləsi aparmaq barədə razılığa gəliblər.

Nəqliyyat və logistika sahəsində əməkdaşlıq da diqqət mərkəzində olub. Xüsusilə birbaşa uçuşların təşkili məsələsi aktual mövzu kimi müzakirə edilib. Mövcud qlobal çağırışlar, o cümlədən aviayanacaq təminatı ilə bağlı çətinliklər fonunda Azərbaycanın bu sahədə üstün imkanlara malik olması yeni əməkdaşlıq perspektivləri yaradır. Birbaşa aviareyslərin açılması həm biznes əlaqələrinin inkişafına, həm də turizm və insanlararası təmasların genişlənməsinə ciddi təkan verə bilər.

Humanitar sahədə əməkdaşlıq da münasibətlərin mühüm istiqamətlərindən biri kimi önə çəkilib. Latviyada 450-dən artıq azərbaycanlı tələbənin təhsil alması ölkələr arasında mədəni və təhsil əlaqələrinin inkişaf etdiyini göstərir. Bu, gələcəkdə ikitərəfli münasibətlərin daha da möhkəmlənməsi üçün insan kapitalının formalaşmasına xidmət edən vacib amildir.

Görüşlər zamanı regional təhlükəsizlik məsələləri də geniş müzakirə olunub. Prezident İlham Əliyev Cənubi Qafqazda baş verən proseslər, xüsusilə Azərbaycan-Ermənistan münasibətlərində sülh gündəliyi barədə son vəziyyətlə bağlı məlumat verib. Qeyd olunub ki, son dövrlərdə müşahidə edilən müsbət dinamika, o cümlədən iqtisadi və humanitar əlaqələrin bərpası regionda davamlı sülhün təmin olunması üçün real zəmin yaradır. Bu kontekstdə Azərbaycanın nümayiş etdirdiyi siyasi iradə və strateji yanaşma beynəlxalq müstəvidə də mühüm nümunə kimi qiymətləndirilir.

Ümumilikdə, Latviya Prezidentinin Azərbaycana səfəri iki ölkə arasında mövcud olan möhkəm siyasi dialoqun, qarşılıqlı etimadın və strateji tərəfdaşlığın daha da gücləndiyini təsdiqləyir. Prezidentlərin şəxsi münasibətlərinin də bu prosesə müsbət təsir göstərdiyi xüsusi vurğulanır. Bakı görüşləri və əldə olunan nəticələr göstərir ki, Azərbaycan–Latviya əlaqələri təkcə siyasi müstəvidə deyil, iqtisadi, nəqliyyat, humanitar və təhlükəsizlik sahələrində də yeni məzmun qazanaraq daha geniş və praktik əməkdaşlıq mərhələsinə daxil olur.

Xocalı rayon ziyalısı Elxan Zamanov