2025-ci il iyulun 2-də Özbəkistan Prezidenti Şavkat Mirziyoyevin Azərbaycana dövlət səfəri çərçivəsində keçirilən görüşlər və verilən açıqlamalar iki qardaş xalq arasında münasibətlərin nə qədər dərin və çoxşaxəli olduğunu bir daha nümayiş etdirdi. Prezident İlham Əliyevin mətbuata verdiyi bəyanatda əks olunan fikirlər bu münasibətlərin gələcək perspektivlərinə dair ciddi nikbinlik doğurur. Bu səfər təkcə protokol xarakterli bir tədbir deyil, həm də regional əməkdaşlıq, iqtisadi inteqrasiya və mədəni yaxınlaşma baxımından önəmli bir mərhələ hesab oluna bilər.

Azərbaycan və Özbəkistan arasında 2022-ci ildə imzalanmış Müttəfiqlik münasibətləri haqqında Müqavilə ölkələrimizin əlaqələrinin mahiyyətini müəyyənləşdirən strateji sənəddir. Prezident İlham Əliyevin qeyd etdiyi kimi, bu sənəd ölkələrarası münasibətlərdə ən yüksək səviyyəni ifadə edir. İki ildən artıqdır ki, bu münasibətlər təkcə sözlə deyil, konkret addımlar və birgə layihələrlə möhkəmlənir. Hazırda iqtisadiyyat, energetika, kənd təsərrüfatı, nəqliyyat, təhsil və sosial sahələrdə əməkdaşlıq real nəticələr doğurur.

Özbəkistanın beynəlxalq idman arenalarında əldə etdiyi uğurlar Azərbaycan tərəfindən xüsusi rəğbətlə qarşılanır. Prezident Mirziyoyevin rəhbərliyi ilə həyata keçirilən gənclər və idman siyasəti nəticəsində Özbəkistan milli komandası futbol üzrə dünya çempionatının final mərhələsinə çıxmaqla öz tarixində mühüm bir səhifə açmışdır. Bu nailiyyətlər təsadüfi deyil və ümumi inkişaf strategiyasının parlaq nəticəsidir.

İkitərəfli iqtisadi əməkdaşlığın gücləndirilməsi istiqamətində mühüm addımlar atılır. 500 milyon dollar kapitala malik Azərbaycan-Özbəkistan Birgə İnvestisiya Fondu artıq konkret layihələrlə işləməyə başlayıb. Prezident İlham Əliyevin qeyd etdiyi kimi, bu layihələr energetika, turizm, kənd təsərrüfatı və sənaye kimi vacib sahələri əhatə edir. Qarşılıqlı sərmayələrin artması təkcə iqtisadi göstəricilərə deyil, həm də xalqlar arasında əlaqələrin güclənməsinə xidmət edir.

Nəqliyyat-logistika sahəsində əməkdaşlıq xüsusi diqqətə layiqdir. Mərkəzi Asiyanı Xəzər üzərindən Qərbə bağlayan Orta Dəhliz layihəsi həm Azərbaycan, həm də Özbəkistan üçün strateji əhəmiyyət kəsb edir. Bu dəhliz region ölkələri arasında yükdaşıma imkanlarını artırmaqla yanaşı, həm də Avrasiya məkanında mühüm nəqliyyat mərkəzi rolunu oynamaq iddiasında olan Azərbaycanın imkanlarını genişləndirir.

Kənd təsərrüfatı sahəsində əməkdaşlıq da yüksələn xətlə inkişaf edir. Xüsusilə Özbəkistanın pambıqçılıq və ipəkçilik sahəsindəki təcrübəsinin Azərbaycana ötürülməsi kənd təsərrüfatının müasirləşməsinə ciddi töhfə verir. Eyni zamanda, emal müəssisələrinin birgə qurulması əlavə dəyər yaradan sənaye sahələrinin inkişafına şərait yaradır.

Qarabağın bərpasına verdiyi dəstəyə görə Azərbaycan dövləti və xalqı Özbəkistana dərin minnətdarlıq hissi bəsləyir. Füzulidə Özbəkistanın vəsaiti hesabına inşa olunan və Mirzə Uluqbəyin adını daşıyan məktəb, eləcə də Xankəndidə yaradılan tikiş fabriki, həm iqtisadi canlanmaya, həm də sosial reabilitasiyaya yönəlmiş mühüm layihələrdir. Bu təşəbbüslər özündə təkcə maddi dəstəyi deyil, həm də mənəvi həmrəyliyi ehtiva edir.

Səfər çərçivəsində daha bir önəmli hadisə – Özbəkistanın Azərbaycandakı yeni səfirlik binasının açılışı oldu. Bu bina təkcə diplomatik nümayəndəlik deyil, həm də iki ölkənin dostluq və qarşılıqlı hörmətinin simvoluna çevrilir. Bununla yanaşı, Bakının “Ağ şəhər” layihəsi çərçivəsində yaradılacaq “Özbəkistan” parkı paytaxtın mərkəzində özünəməxsus mədəniyyət məkanına çevriləcək. Bu park həm vətəndaşlar, həm də turistlər üçün dəyərli istirahət və tanıtım məkanı olacaq.

Bütün bu təşəbbüslər göstərir ki, Azərbaycan və Özbəkistan yalnız bu günü deyil, sabahı da düşünərək münasibətlərini qurur. Hər iki dövlət liderinin iradəsi, xalqlarımızın ortaq tarixi və mədəni dəyərləri bu əlaqələrin uzunmüddətli və dayanıqlı olacağına zəmanət verir. Bu gün imzalanan sənədlər, həyata keçirilən layihələr və ortaq baxışlar gələcəkdə daha sıx əməkdaşlıq üçün geniş zəmin yaradır. İki dövlətin dostluğu təkcə region üçün deyil, bütün türkdilli dünyada əməkdaşlıq nümunəsi kimi qəbul edilir.

Xocalı rayon ziyalısı Mətanət Zamanova