Azərbaycan və Vyetnam ortaq gələcəyə doğru əmin addımlarla irəliləyir

Azərbaycan Prezidenti İlham Əliyev 7 may 2025-ci il tarixində Vyetnam Kommunist Partiyasının Baş katibi To Lamın rəsmi səfəri çərçivəsində keçirilən mətbuat konfransında verdiyi bəyanatda iki ölkə arasında möhkəm dostluq və əməkdaşlıq münasibətlərinin daha da inkişaf edəcəyini bildirib. Dövlət başçısı Vyetnam liderinin səfərini tarixi hadisə kimi dəyərləndirərək qeyd edib ki, bu görüşlər Azərbaycan-Vyetnam əlaqələrinin gələcək inkişafına strateji təkan verəcək.

Prezident İlham Əliyev bəyan edib ki, ikitərəfli münasibətlər geniş perspektivlərə malikdir və bu səfər çərçivəsində əldə olunan razılaşmalar həm siyasi, həm iqtisadi, həm də mədəni sahələrdə yeni imkanlar açır. O, xüsusilə kənd təsərrüfatı, alternativ enerji, infrastruktur və texnologiyalar sahəsində əməkdaşlığın gücləndirilməsi üçün böyük potensial olduğunu vurğulayıb.

Mətbuata verdiyi açıqlamada Prezident Əliyev Azərbaycanın Asiya ilə əlaqələrinin dərinləşdiyini, Vyetnamla münasibətlərin isə bu siyasətin vacib sütunlarından biri olduğunu qeyd edib. O bildirib ki, hər iki ölkə regional və beynəlxalq sülhə, təhlükəsizliyə və qarşılıqlı inkişafa töhfə verməyə hazırdır. Prezident onu da əlavə edib ki, bu səfər təkcə diplomatik münasibətlərin deyil, xalqlar arasında dostluğun da güclənməsinə xidmət edir.

Prezident İlham Əliyevin bəyanatı Azərbaycan-Vyetnam əlaqələrinin yeni dövrə qədəm qoyduğunu və bu münasibətlərin ortaq maraqlara əsaslanan davamlı əməkdaşlığa söykəndiyini bir daha nümayiş etdirdi.
Elxan Zamanov
Xocalı rayon Cəmilli kənd tam orta məktəbin müəllimi