25 noyabr Azərbaycan xalqının hafizəsində təkcə bir tarix kimi deyil, illərlə çəkilən nisgilin bitdiyi, işığın qaranlığa qalib gəldiyi gün kimi yaşanır. Bu gün Kəlbəcərin azad olunması ilə bağlı qəlblərdə dirçələn sevincin, bu torpağın Vətənə yenidən qovuşmasının simvoludur. Kəlbəcər əsrlərdən bəri özünün bənzərsiz təbiəti, isti bulaqları, sərt dağları, qədim yaşayış izləri və tarixi abidələri ilə Azərbaycan mədəniyyətinin ayrılmaz parçası olub. Min illik qayalıqlarda həkk olunan qaya təsvirləri, qədim yaşayış məskənləri, türk mədəniyyətini yaşadan nümunələr bu diyarın nə qədər dərin tarixə sahib olduğunu sübut edir. Bu zənginliklər uzun illər işğalın zülmü altında qaldı, kəndlər dağıdıldı, abidələr məhv edildi, təbiət talan olundu. Amma xalqın iradəsi, dövlətimizin gücü və Azərbaycan Ordusunun şücaəti sayəsində Kəlbəcər yenidən öz sahiblərinə qovuşdu və 25 noyabr bu qayıdışın əbədiləşdirilmiş gününə çevrildi.

Bu gün Kəlbəcər yalnız azad edilmiş bölgə kimi deyil, həm də Azərbaycanın ən böyük bərpa və yenidənqurma proqramlarının həyata keçirildiyi məkan kimi seçilir. Şəhər və kəndlərin tamamilə yenidən qurulması, müasir yol və tunel infrastrukturunun yaradılması, yeni enerji və su layihələrinin icrası Kəlbəcəri qısa zamanda ölkənin ən dinamik inkişaf bölgələrindən birinə çevirir. Hər gün tikilən yeni evlər, çəkilən yollar, qurulan kəndlər Kəlbəcərin gələcəyinə bir addım daha yaxınlaşdığımızın sübutudur. Bu torpağın doğal gözəlliyi müasir inkişafla birləşərək həm regionun iqtisadi potensialını artırır, həm də gələcək sakinlər üçün komfortlu yaşayış mühiti yaradır.

25 noyabr bu gün həm də xalqın Kəlbəcərə olan sevgisinin, illərdir içində yaşatdığı qayıdış arzusunun gerçəkləşdiyi gündür. Dağların zirvələri indi sevincin səsini daha gur qaytarır, təbiət sanki yenidən nəfəs alır. Kəlbəcər bu gün təkcə bir ərazi deyil, həm də dirçəlişin, ayağa qalxmağın, qürurla sabaha baxmağın rəmzidir. Qədimdən gələn ruhu, bu günün quruculuğu və sabahın parlaq ümidləri ilə Kəlbəcər artıq yenidən doğulmuş bir Azərbaycan şəhəridir. 25 noyabr isə bu doğuluşun ən müqəddəs tarixidir.

Xocalı rayon ziyalısı Vüsal Mustafayev