Uzun illərin həsrəti, gözlərdə donub qalmış nisgil 2025-ci ilin avqustunda sevincə çevrildi. O gün Kəlbəcər illərdən sonra öz sakinlərini yenidən qarşıladı. Biz, köçkün düşmüş insanlar, ata-baba yurduna qayıdanda sanki həyat yenidən canlandı.
Prezident İlham Əliyevin Kəlbəcərə gəlişi və burada söylədiyi sözlər bizim üçün tarixin yaddaşına yazılan an oldu: “Qarabağ Azərbaycandır!” – bu sadəcə şüar deyildi, bu xalqın iradəsinin, mübarizəsinin və haqqın zəfərinin təntənəsi idi.
Kəlbəcərə qayıdanda gözlərimiz dağların, bulaqların hər daşında illərin nisgilini, həm də sevinci gördü. Uşaqlar həyətdə oynadı, analar göz yaşları ilə evlərinin qapısını öpdü, yaşlılar isə torpağı qucaqlayıb şükür etdilər. Hər kəsin qəlbində eyni bir duyğu vardı – doğma yurduna qovuşmağın fərəhi.
İndi Kəlbəcər təkcə bir rayon deyil, həm də azadlığın, ədalətin və dövlətin qüdrətinin rəmzidir. Burada tikilən yeni evlər, qurulan məktəblər və parklar gələcəyin müjdəçisi oldu. Hər bir ailə bilir ki, uşaqları ata-babalarının torpağında böyüyəcək, dağların havasını ciyərinə çəkəcək.
Bu gün biz böyük qürurla deyirik: “Kəlbəcər artıq bizimlədir, biz də Kəlbəcərlə!”
Xocalı rayon ziyalısı Vüsalə İsgəndərova