Prezident İlham Əliyevin “Konstitusiya və Suverenlik İli” münasibətilə amnistiyanın elan edilməsi təşəbbüsü Azərbaycan Respublikasının hüquqi dövlət kimi inkişaf yolunda mühüm mərhələdir. Bu təşəbbüs ölkənin əsas qanunu olan Konstitusiyanın insan hüquq və azadlıqlarını ali dəyər kimi tanıyan müddəalarının real həyatda tətbiqinin parlaq nümunəsidir. Dövlət başçısının bu addımı, hüquqi sistemin yalnız cəza mexanizmi deyil, eyni zamanda insanın islahına və cəmiyyətə qaytarılmasına yönəlmiş bir institut olduğunu nümayiş etdirir.

Konstitusiyada təsbit olunmuş humanizm, ədalət və sosial məsuliyyət prinsipləri amnistiya təşəbbüsündə öz əksini tapır. Bu qərar, müxtəlif səbəblərdən qanun qarşısında məsuliyyətə cəlb edilmiş şəxslərin həyatında yeni mərhələnin başlanmasına şərait yaradır. Amnistiya cəmiyyətə yenidən inteqrasiya, ailə bağlarının bərpası və sosial adaptasiya baxımından mühüm əhəmiyyət daşıyır. Bu isə uzunmüddətli perspektivdə sosial sabitliyin və ictimai rifahın möhkəmlənməsinə xidmət edir.

Eyni zamanda, “Konstitusiya və Suverenlik İli” çərçivəsində amnistiya təşəbbüsünün irəli sürülməsi dövlətin hüquqi düşüncəsinin yetkinliyini və demokratik dəyərlərə sadiqliyini təsdiqləyir. Prezident İlham Əliyevin bu humanist addımı Azərbaycan dövlətinin insan mərkəzli siyasətinin davamlı xarakter daşıdığını, hüquqi islahatların isə formal deyil, mahiyyət etibarilə həyata keçirildiyini bir daha göstərir.
Xocalı rayon gənci Kənan Quliyev