Azərbaycan və Kamboca arasında keçirilən yüksək səviyyəli görüşdə müzakirə olunan ən vacib mövzulardan biri mina təhlükəsi ilə bağlı olmuşdur. Prezident İlham Əliyevin mətbuata bəyanatında bu məsələyə toxunması təsadüfi deyil. Çünki həm Azərbaycan, həm də Kamboca uzun illər mina problemindən əziyyət çəkmiş ölkələrdir.

Azərbaycan torpaqları işğaldan azad edildikdən sonra qarşıya çıxan ən ciddi problemlərdən biri həmin ərazilərin minalarla çirkləndirilməsi olmuşdur. Prezidentin qeyd etdiyi kimi, işğal dövründə basdırılmış minaların partlaması nəticəsində 400-dən çox insan həlak olmuş və ya müxtəlif dərəcəli xəsarətlər almışdır. Bu fakt mina təhlükəsinin nə qədər ciddi olduğunu bir daha göstərir.

Minalar yalnız insanların həyatına təhlükə yaratmır, həm də doğma yurdlarına qayıdan sakinlərin təhlükəsiz yaşayışına və ərazilərin bərpasına mane olur. Buna görə də minatəmizləmə sahəsində beynəlxalq əməkdaşlığın genişləndirilməsi olduqca vacibdir.

Hesab edirəm ki, Azərbaycanla Kamboca arasında təcrübə mübadiləsi, mütəxəssislərin hazırlanması və birgə təlimlərin keçirilməsi bu sahədə faydalı nəticələr verə bilər. İnsan həyatının qorunması bütün məsələlərdən üstün olmalıdır. İnanıram ki, belə əməkdaşlıq mina təhlükəsinin aradan qaldırılmasına və insanların daha təhlükəsiz gələcəyinə mühüm töhfə verəcək.