Azərbaycan Respublikasının Prezidenti İlham Əliyev martın 13-də XII Qlobal Bakı Forumu çərçivəsində Euronews telekanalına geniş müsahibə verib. Müsahibədə dövlət başçısı beynəlxalq münasibətlərdə yeni çağırışları, Azərbaycanın xarici siyasət prioritetlərini və regionda sabitliyin qorunması üçün atılan addımları dəyərləndirib.
Prezident İlham Əliyev dünyada gedən siyasi və iqtisadi dəyişikliklər fonunda Azərbaycanın müstəqil siyasət yürütməyə davam etdiyini vurğulayıb. O, beynəlxalq hüququn selektiv tətbiqinin ölkələrin suverenliyinə və təhlükəsizliyinə ciddi təsir etdiyini qeyd edərək, Azərbaycanın öz maraqlarını qorumaq üçün müstəqil qərarlar verdiyini bildirib.
Dövlət başçısı, həmçinin, Cənubi Qafqazda mövcud vəziyyətə toxunaraq, Azərbaycanın bölgədə sülh və təhlükəsizliyin təmin olunmasına töhfə verməyə hazır olduğunu bildirib. O, Azərbaycanın sülh gündəliyini irəli sürdüyünü və davamlı dialoq yolu ilə problemlərin həllinə sadiq qaldığını vurğulayıb.
Enerji təhlükəsizliyi məsələsinə də toxunan Prezident İlham Əliyev Azərbaycanın Avropanın enerji təchizatında mühüm rol oynadığını və ölkəmizin bu sahədə strateji tərəfdaş kimi etibarlılığını qoruduğunu qeyd edib. O, yeni enerji layihələrinin regional əməkdaşlığı gücləndirəcəyini və Azərbaycanın dünya bazarlarında mövqeyini daha da möhkəmləndirəcəyini bildirib.
Prezidentin Euronews-a verdiyi bu müsahibə, Azərbaycanın beynəlxalq arenada artan rolunu, geosiyasi reallıqlara uyğun çevik siyasət yürütməsini və ölkənin regional sabitlik üçün göstərdiyi səyləri bir daha nümayiş etdirdi.
Xocalı rayon ziyalısı Bəxtiyar Allahverdiyev