Şuşa Bəyannaməsi: Azərbaycan-Türkiyə Münasibətlərində Yeni Tarixi Mərhələ.

2021-ci il iyunun 15-də Azərbaycanın mədəniyyət paytaxtı Şuşa şəhərində imzalanmış “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” iki qardaş ölkənin münasibətlərində yeni bir mərhələnin əsasını qoymuşdur. Milli Qurtuluş Günündə imzalanan bu mühüm sənəd Azərbaycan və Türkiyə arasında mövcud olan dostluq, qardaşlıq və strateji tərəfdaşlıq əlaqələrini daha da möhkəmləndirərək onları müttəfiqlik səviyyəsinə yüksəltmişdir.

Şuşa Bəyannaməsi təkcə iki dövlət arasında imzalanmış siyasi sənəd deyil, eyni zamanda ortaq tarixə, milli-mənəvi dəyərlərə və gələcək inkişaf hədəflərinə əsaslanan strateji əməkdaşlıq platformasıdır. Bəyannamə Azərbaycan və Türkiyənin regional və beynəlxalq məsələlərdə vahid mövqedən çıxış etməsini, milli maraqların qorunması naminə qarşılıqlı dəstəyin gücləndirilməsini nəzərdə tutur.

Sənəddə siyasi, iqtisadi, hərbi, enerji, nəqliyyat, mədəniyyət, təhsil, informasiya və diaspor fəaliyyəti kimi mühüm istiqamətlər üzrə əməkdaşlığın genişləndirilməsi öz əksini tapmışdır. Bu isə göstərir ki, Azərbaycan-Türkiyə münasibətləri yalnız müəyyən sahələrlə məhdudlaşmır, dövlət həyatının bütün istiqamətlərini əhatə edən çoxşaxəli əməkdaşlıq modelinə çevrilmişdir.

Şuşa Bəyannaməsinin mühüm cəhətlərindən biri onun regional inkişaf və inteqrasiya proseslərinə verdiyi töhfədir. Sənəddə qeyd olunan nəqliyyat və logistika layihələri, xüsusilə Zəngəzur dəhlizi ilə bağlı perspektivlər regionun iqtisadi xəritəsini dəyişdirəcək mühüm təşəbbüslər kimi qiymətləndirilir. Bu layihələr Türk dünyası arasında əlaqələri daha da gücləndirməklə yanaşı, Avropa ilə Asiya arasında yeni iqtisadi körpülərin formalaşmasına xidmət edir.

Bəyannamə işğaldan azad edilmiş ərazilərin bərpası və yenidən qurulması sahəsində də əməkdaşlıq üçün geniş imkanlar yaradır. Türkiyə şirkətlərinin Qarabağ və Şərqi Zəngəzurda həyata keçirilən layihələrdə fəal iştirakı Azərbaycan-Türkiyə qardaşlığının real nəticələrini nümayiş etdirir. Bu əməkdaşlıq bölgənin iqtisadi dirçəlişinə və yeni investisiya imkanlarının yaranmasına mühüm töhfə verir.

Şuşa Bəyannaməsinin təhlükəsizlik və müdafiə sahəsinə aid müddəaları xüsusi əhəmiyyət daşıyır. Sənəd iki ölkənin hərbi əməkdaşlığının daha da dərinləşdirilməsini, müdafiə sənayesi sahəsində birgə layihələrin həyata keçirilməsini və regional təhlükəsizliyin möhkəmləndirilməsi istiqamətində koordinasiyalı fəaliyyət göstərilməsini nəzərdə tutur. Bu yanaşma regionda sülhün və sabitliyin qorunmasına xidmət edən mühüm amillərdən biridir.

Bu gün Şuşa Bəyannaməsi Azərbaycan və Türkiyənin strateji müttəfiqliyinin əsas siyasi sənədi kimi çıxış edir. Onun müddəalarının ardıcıl şəkildə həyata keçirilməsi hər iki dövlətin iqtisadi gücünün, siyasi nüfuzunun və beynəlxalq mövqeyinin daha da möhkəmlənməsinə xidmət edir. Şuşada imzalanmış bu tarixi sənəd qardaş ölkələrin birliyinin, həmrəyliyinin və ortaq gələcəyə olan inamının parlaq təcəssümüdür.

Şuşa Bəyannaməsi Azərbaycan-Türkiyə münasibətlərinin bugünkü səviyyəsini əks etdirməklə yanaşı, gələcək əməkdaşlığın da əsas istiqamətlərini müəyyənləşdirir. Bu sənəd regionda sülhün, inkişafın və təhlükəsizliyin təmin olunmasına xidmət edən mühüm strateji platforma kimi tarixdə öz layiqli yerini tutmuşdur.

Xocalı rayon ziyalısı Anar Əliyev.