2025-ci il mayın 21-də Macarıstanın paytaxtı Budapeştdə keçirilən Türk Dövlətləri Təşkilatının (TDT) Dövlət başçılarının qeyri-rəsmi Zirvə görüşü, təşkilata üzv ölkələr arasında siyasi, iqtisadi və mədəni əməkdaşlığın yeni mərhələyə qədəm qoyduğunu nümayiş etdirdi. Görüş çərçivəsində Azərbaycan Respublikasının Prezidenti İlham Əliyevin çıxışı həm təşkilatın gələcəyi, həm də bölgədə baş verən mühüm geosiyasi proseslər fonunda Azərbaycanın mövqeyini və strateji baxışını ortaya qoydu.

Prezident İlham Əliyev çıxışında Türk dünyasının birliyinin və həmrəyliyinin əhəmiyyətinə xüsusi diqqət çəkdi. O, qeyd etdi ki, türkdilli ölkələr arasında əməkdaşlıq yalnız ortaq tarixi, mədəni və etnik köklərə deyil, həm də ortaq maraqlara, geosiyasi və iqtisadi baxımdan bir-birini tamamlayan strateji mövqelərə əsaslanır. Bu baxımdan, Azərbaycanın Türk Dövlətləri Təşkilatındakı rolu getdikcə daha da möhkəmlənir və regional güc mərkəzlərindən birinə çevrilir.

Prezidentin çıxışında vurğulanan əsas məqamlardan biri Zəngəzur dəhlizi ilə bağlı idi. İlham Əliyev bu dəhlizin açılmasının yalnız Azərbaycanın deyil, bütövlükdə Türk dünyasının iqtisadi və logistik baxımdan birləşməsi üçün vacib olduğunu bildirdi. Bu layihə Orta Dəhliz çərçivəsində Asiya ilə Avropa arasında ən qısa və təhlükəsiz yol kimi çıxış edəcək. Prezident həmçinin qeyd etdi ki, Azərbaycanın bu istiqamətdə atdığı addımlar suverenliyinə və milli maraqlarına tam uyğun olaraq həyata keçirilir və bu, Cənubi Qafqazda uzunmüddətli sülhün bərqərar olması üçün mühüm amildir.

Prezident İlham Əliyev çıxışında 2020-ci ildə Qarabağ müharibəsində qazanılan qələbə və 2023-cü ildə ölkənin tam ərazi bütövlüyünün bərpası fonunda yaranan yeni reallıqlara da toxundu. O bildirdi ki, bu reallıqlar Cənubi Qafqazda sülh və əməkdaşlıq üçün tarixi imkanlar yaradır və Azərbaycan bu fürsətlərin dəyərləndirilməsində fəal rol oynayır. O, bir daha bəyan etdi ki, Azərbaycanın bölgədə yaratdığı sabitlik modeli Türk Dövlətləri Təşkilatı üçün də nümunəvi xarakter daşıyır.

Təhlükəsizlik məsələlərinə toxunan dövlət başçısı regional və qlobal çağırışlar qarşısında Türk dövlətlərinin daha koordinasiyalı şəkildə hərəkət etməsinin vacibliyini vurğuladı. Prezident Azərbaycanın həm ikitərəfli, həm də çoxtərəfli formatlarda Türk dünyası ilə hərbi, enerji və informasiya təhlükəsizliyi sahələrində əməkdaşlığa hazır olduğunu bəyan etdi.

İlham Əliyevin çıxışı həmçinin Azərbaycan-Macarıstan əlaqələrinə də toxundu. O, Macarıstanın Türk Dövlətləri Təşkilatında müşahidəçi statusuna malik olmasını yüksək qiymətləndirdi və Budapeştin türkdilli ölkələrlə əməkdaşlıqda oynadığı rolu qeyd etdi. Prezident bu əlaqələrin daha da genişlənməsinin Avropa ilə Türk dünyası arasında körpü rolunu gücləndirəcəyini vurğuladı.

Sonda Prezident İlham Əliyev Türk Dövlətləri Təşkilatının gələcəyinə inamını ifadə edərək bildirdi ki, təşkilat üzv ölkələrin qarşılıqlı dəstəyi və strateji yanaşmaları nəticəsində dünya miqyasında nüfuzlu regional aktora çevrilmək potensialına malikdir. Azərbaycan bu məqsədə çatmaq üçün bütün imkanlarını səfərbər etməyə hazırdır.

Budapeşt Zirvə görüşündə Prezident İlham Əliyevin çıxışı, Azərbaycanın yalnız Türk dünyasında deyil, həm də beynəlxalq miqyasda təşəbbüskar və müstəqil siyasət yürüdən bir dövlət olduğunu bir daha nümayiş etdirdi. Bu çıxış, Azərbaycanın regional əməkdaşlıqda liderliyini, Türk dünyasının inteqrasiyasında oynadığı əsas rolu və gələcəyə yönəlik strateji baxışını əks etdirdi.
Xocalı şəhər sakini Zefer Zamanlı.