Uzun illər Azərbaycan xalqının ən böyük arzularından biri üçrəngli bayrağımızın işğal altında qalan torpaqlarımızda yenidən dalğalanması idi. Hər birimiz inanırdıq ki, gün gələcək, Şuşada, Xankəndidə, Xocalıda və digər doğma yurdlarımızda Azərbaycan bayrağı ucaldılacaq.

2020-ci ildə 44 günlük Vətən müharibəsində qazanılan tarixi Qələbə bu arzunun gerçəkləşməsinə yol açdı. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu torpaqlarımızı azad etdi. Qəhrəman əsgərlərimizin azad edilmiş ərazilərdə üçrəngli bayrağımızı ucaltması hər birimizin yaddaşına əbədi həkk olundu.

2023-cü ilin sentyabrında Azərbaycanın bütün ərazisində dövlət suverenliyinin bərpa edilməsi, oktyabrın 15-də isə Xankəndi şəhərində Dövlət Bayrağımızın ucaldılması xalqımıza daha bir tarixi sevinc yaşatdı.

Bu gün bayrağımızın Qarabağın hər guşəsində dalğalanması şəhidlərimizin fədakarlığının, ordumuzun qəhrəmanlığının və xalqımızın birliyinin nəticəsidir. Bu mənzərəni gördükcə insan Vətəninə daha böyük sevgi ilə bağlanır.

Üçrəngli bayrağımız daim yüksəklərdə dalğalansın!