Ulu Öndər Heydər Əliyevin siyasi irsi, onun cəsarəti və Vətənə sadiqliyi ilə sıx bağlıdır. O, hər zaman xalqının və dövlətinin maraqlarını şəxsi mənafeyindən üstün tutaraq, ölkəsinin gələcəyi naminə çətin və bəzən təhlükəli qərarlar verməkdən çəkinməyib. Onun həyat və fəaliyyət yolu Azərbaycan xalqının taleyində həlledici rol oynamışdır.

Heydər Əliyevin cəsarətli mövqeyi xüsusilə Sovet dövründə, Azərbaycan xalqının hüquqlarının müdafiəsində, milli kimliyin qorunmasında və dilimizin rəsmi status alması üçün göstərdiyi səylərdə aydın görünür. O, SSRİ kimi böyük bir imperiyanın siyasi strukturlarında çalışsa da, daim Azərbaycan xalqının maraqlarını müdafiə etmiş və bu mövqeyini açıq şəkildə nümayiş etdirmişdir. 1978-ci ildə Azərbaycan dilinin dövlət dili kimi Konstitusiyada təsbit olunması onun bu cəsarətinin bariz nümunələrindən biridir.

1990-cı illərin əvvəllərində Azərbaycanın mürəkkəb və təhlükəli bir dövr yaşadığı zaman, Heydər Əliyev xalqın çağırışı ilə yenidən siyasi arenaya qayıtdı. O zaman ölkədə xaos, vətəndaş qarşıdurması və xarici təhdidlər hökm sürürdü. Bu şəraitdə dövlət rəhbərliyini öz üzərinə götürmək böyük cəsarət və fədakarlıq tələb edirdi. Heydər Əliyev bu məsuliyyəti öz üzərinə götürərək Azərbaycanı parçalanmaq təhlükəsindən xilas etdi və sabitlik, inkişaf yoluna çıxardı.

Onun Vətənə sadiqliyi təkcə sözlərdə deyil, bütün fəaliyyəti boyu əməllərində əks olunurdu. Qarabağ problemi ilə bağlı prinsipial mövqeyi, ordu quruculuğuna verdiyi önəm, beynəlxalq aləmdə Azərbaycanın maraqlarının qorunması uğrunda apardığı diplomatik mübarizə onun necə fədakar və vətənpərvər lider olduğunu bir daha sübut edir.

Heydər Əliyev üçün Azərbaycan sadəcə bir coğrafi ərazi deyil, milli kimliyin, tariximizin və gələcəyimizin simvolu idi. Onun dövlətə və xalqa bağlılığı, ağır dövrlərdə göstərdiyi liderlik, cəsarətli qərarları və sarsılmaz iradəsi bu gün də Azərbaycan xalqı üçün örnəkdir. Ulu Öndərin bu mövqeyi, Vətənə sədaqət anlayışının ən ali təcəssümüdür və gələcək nəsillərə əsl vətənpərvərlik nümunəsi kimi çatdırılmalıdır.
Xocalı şəhər 4 saylı tam orta məktəbin müəllimi Şahnaz Əliyeva