Dünya Azərbaycanlılarının Həmrəyliyi Günü Azərbaycan xalqının milli azadlıq mübarizəsinin, tarixi yaddaşının və ümummilli birliyinin parlaq ifadəsidir. Bu əlamətdar gün artıq xalqımız üçün xoş və mənalı bir ənənəyə çevrilmiş, dünyanın müxtəlif guşələrində yaşayan milyonlarla azərbaycanlını vahid amal və ideya ətrafında birləşdirən mühüm bayram kimi tarixə yazılmışdır. Ümummilli Lider Heydər Əliyevin qeyd etdiyi kimi, həmrəylik günü Azərbaycan xalqının dirçəlişini, tərəqqisini və milli birliyini özündə ehtiva edən, müstəqil dövlətçilik uğrunda müqəddəs mübarizəyə səfərbər edən inam və ümid anıdır.

Dünya Azərbaycanlılarının Həmrəyliyi Gününün dövlət bayramı kimi təsis olunması bilavasitə Ulu Öndər Heydər Əliyevin adı ilə bağlıdır. 1991-ci il dekabrın 16-da Naxçıvan Muxtar Respublikası Ali Məclisinin sədri kimi onun rəhbərliyi ilə qəbul olunan qərarla 31 dekabr Dünya Azərbaycanlılarının Həmrəyliyi Günü elan edilmiş, bu təşəbbüs qısa müddət sonra Azərbaycan Respublikasının Ali Soveti tərəfindən də qanuniləşdirilmişdir. Bununla da, bütün dünya azərbaycanlıları üçün milli birlik ideyasını simvolizə edən rəsmi bayram yaranmışdır. Bu tarixi qərar xalqımızın parçalanmış taleyinə, ayrılıq ağrılarına mənəvi cavab olmaqla yanaşı, gələcəyə yönəlmiş milli ideologiyanın əsasını qoymuşdur.

Həmrəylik Günü, xüsusilə sovet imperiyasının süqutu dövründə Araz çayının hər iki sahilində yaşayan azərbaycanlıların sərhədlərə yürüşü, süni maneələrin dağıdılması və “bir millət” ideyasının açıq şəkildə ifadəsi fonunda milli birliyin rəmzinə çevrilmişdir. Şimali və Cənubi Azərbaycanın ayrılıq həsrətini yaşayan xalqın bu tarixi həmrəyliyi dünya miqyasında azərbaycanlıların vahid millət olduğunu nümayiş etdirmiş, bütöv Azərbaycan arzularını gücləndirmişdir. Bu baxımdan 31 Dekabr təkcə bayram deyil, həm də milli yaddaş, tarixi iradə və gələcəyə inam günüdür.

Ulu Öndər Heydər Əliyev dünya azərbaycanlılarının birliyini daim diqqət mərkəzində saxlamış, həmrəylik ideyasının əsas ideoloqu və təşkilatçısı olmuşdur. Onun xarici səfərləri zamanı soydaşlarımızla mütəmadi görüşləri, diasporun problemlərinə həssas yanaşması, təşkilatlanma ilə bağlı verdiyi tövsiyələr dünya azərbaycanlılarının milli şüurunun möhkəmlənməsində mühüm rol oynamışdır. “Mən həmişə fəxr etmişəm, bu gün də fəxr edirəm ki, mən azərbaycanlıyam!” kəlamı isə hər bir azərbaycanlı üçün milli qürur və kimlik rəmzinə çevrilmişdir.

Bu siyasət Prezident İlham Əliyev tərəfindən müasir dövrün çağırışlarına uyğun şəkildə uğurla davam etdirilir. Dövlət başçısı bütün xarici səfərləri zamanı diaspor nümayəndələri ilə görüşür, onların fəaliyyətini yüksək qiymətləndirir və Azərbaycanın dövlət maraqlarının beynəlxalq müstəvidə müdafiəsində diasporun rolunu xüsusi vurğulayır. Prezident İlham Əliyevin qeyd etdiyi kimi, müstəqil Azərbaycan bütün dünya azərbaycanlılarının Vətənidir və harada yaşamalarından asılı olmayaraq hər bir soydaşımız güclü Azərbaycan dövlətinə arxalana bilər. Bu yanaşma xaricdə yaşayan azərbaycanlılarda milli ruhu yüksəldir, onları vahid ideologiya – azərbaycançılıq məfkurəsi ətrafında birləşdirir.

Dünya Azərbaycanlılarının Qurultayları bu birliyin institusional əsaslarını daha da möhkəmləndirmişdir. 2001-ci ildə keçirilən I Qurultay, sonrakı qurultaylar və xüsusilə 2022-ci ildə Şuşada keçirilmiş V Qurultay – Zəfər Qurultayı dünya azərbaycanlılarının tarixində yeni mərhələ açmışdır. Azad Şuşada keçirilən bu Qurultay Azərbaycanın tarixi Qələbəsinin, milli birliyin və dövlətçilik iradəsinin rəmzi olmuşdur. Prezident İlham Əliyevin vurğuladığı kimi, bu gün Azərbaycan xalqı müzəffər xalq, Azərbaycan dövləti isə qalib dövlətdir və bu qürur bütün dünya azərbaycanlılarına məxsusdur.

Diaspor quruculuğu sahəsində həyata keçirilən ardıcıl tədbirlər, Diasporla İş üzrə Dövlət Komitəsinin yaradılması, Azərbaycan Diasporuna Dəstək Fondunun təsis edilməsi, diaspor fəallarının dövlət mükafatları ilə təltif olunması dünya azərbaycanlılarının təşkilatlanmasını keyfiyyətcə yeni mərhələyə yüksəltmişdir. Bu gün onlarla ölkədə yüzlərlə diaspor təşkilatı, Azərbaycan Evi və koordinasiya şuraları fəaliyyət göstərir, Azərbaycan həqiqətlərinin dünya ictimaiyyətinə çatdırılmasında fəal mövqe nümayiş etdirirlər.

Vətən müharibəsi dövründə dünya azərbaycanlılarının misilsiz həmrəyliyi bu bayramın mahiyyətini daha da dərinləşdirdi. Xaricdə yaşayan soydaşlarımız Azərbaycanın haqq səsini müdafiə etmək üçün bir yumruq kimi birləşdilər, düşmən təxribatlarına qarşı qətiyyətlə çıxış etdilər. Prezident İlham Əliyevin ifadə etdiyi “Dəmir yumruq” bu gün təkcə hərbi gücün deyil, eyni zamanda milli birliyin və dünya azərbaycanlılarının sarsılmaz həmrəyliyinin rəmzinə çevrilmişdir.

Beləliklə, Dünya Azərbaycanlılarının Həmrəyliyi Günü milli birlik, Vətənə sevgi, dövlətçilik ideyalarına sədaqət və azərbaycançılıq məfkurəsinin təntənəsidir. Bu bayram dünyanın harasında yaşamasından asılı olmayaraq hər bir azərbaycanlını eyni kökə, eyni tarixə və eyni gələcəyə bağlayır. Güclü Azərbaycan dövləti, müzəffər xalq və sarsılmaz həmrəylik bu gün dünya azərbaycanlılarının ən böyük qürur mənbəyidir.
Xocalı rayon ziyalısı Anar Əliyev