Prezident İlham Əliyev 25 sentyabr 2025-ci il tarixində Birləşmiş Millətlər Təşkilatının 80-ci sessiyasının plenar iclasında nitq söylədi. O, əvvəlki illərdə davam edən danışıqların, haqsızlıqların və işğal dövrünün xatirələrindən danışdı, amma əsas ton artıq qalibiyyət, yenidənqurma və sülh istiqamətinə yönləndi. Ərazi bütövlüyünün bərpası ilə başlayan yeni mərhələ, ölkəsinin beynəlxalq siyasətdə artan fəallığı, investisiya və enerjidə strateji addımları Prezidentin nitqində əsas yerləri tutdu.
Nitqində İlham Əliyev bildirdi ki, uzun illər boyunca Azərbaycan ərazisinin böyük hissəsi işğal altında qalmışdı və bu müddət ərzində bir milyona yaxın azərbaycanlı öz doğma yurd-yuvalarından didərgin düşmüşdü. Onun dediyinə görə, münaqişənin dondurulmuş vəziyyətdə qalması beynəlxalq vasitəçilərin sükutla müşayiət etdiyi bir status-kyo yaradıb. 2020-ci ildə Azərbaycan özünümüdafiə hüququndan istifadə edərək müharibə yolu ilə işğala son qoydu və 10 noyabr 2020-ci ildə ərazi bütövlüyü bərpa edildi.
Prezident nitqində həmçinin Ermənistanla münasibətlərdə yeni dövrün başlamasından söz açdı. O qeyd etdi ki, 8 avqust 2025-ci ildə Vaşinqtonda Azərbaycan və Ermənistan xarici işlər nazirləri sülh sazişi layihəsini ilkinləşdiriblər, eyni gündə Prezident və Baş nazir Birləşmiş Bəyannaməni imzalayıblar. Bu proses ikitərəfli əsasda, xarici müdaxilə olmadan aparıldığı üçün ədalətli yanaşma xarakteri daşıyır.
İlham Əliyev bölgədə kommunikasiyanın roluna xüsusi diqqət ayırdı və “Trump Route for International Peace and Prosperity” adlanan Zəngəzur dəhlizi ideyasını irəli sürdü. Bu dəhlizin açılması regionda nəqliyyat əlaqələrini gücləndirəcək və tərəfdaş ölkələrlə əlaqələri asanlaşdıracaq. Eyni zamanda ölkəsinin enerji siyasətindən, qaz tədarükü istiqamətlərindən, bərpa olunan enerji layihələrindən və investisiya mühitindən danışdı.
Nitqdə humanitar məsələlər də ön plana çıxdı: minalanmış ərazilər, məcburi köçkünlərin təhlükəsiz geri dönüşü, itkin düşənlərin durumu və təbii ətraf mühitin qorunması mövzularına toxundu. O, Xəzər dənizinin ekoloji böhran qarşısında çəkdiyi problemlərə də diqqət çəkdi və sahilyanı dövlətlərin birgə səylər göstərməsinin vacibliyini vurğuladı.
Sonunda Prezident İlham Əliyev bildirdi ki, Azərbaycan artıq yeni mərhələyə daxil olub: müharibədə və sülhdə qazandığımız uğurlar bizi yenidən qurulan dövləti qurmağa, beynəlxalq əlaqələri genişləndirməyə və hüququ üstün tutan dünyada öz yerimizi möhkəmləndirməyə çağırır. O, beynəlxalq hüquq, suverenlik, ədalət prinsipləri əsasında qarşılıqlı hörmət və əməkdaşlıqla yeni dünyanın qurulmasına inandığını qeyd etdi.
Xocalı rayon ziyalısı Aydın Həsənov