Qürurumuz və Hüznümüzün Günü
Hər xalqın tarixində dönüm nöqtəsi sayılan hadisələr var. Bizim üçün 20 Yanvar belə günlərdən biridir. Hər il bu tarixi xatırlamaq, şəhidlərimizi anmaq və azadlığımızın bədəlinin nə qədər ağır olduğunu dərk etmək üçün başımızı dik tuturuq. Bu günün üzərindən 35 il keçsə də, o gecənin soyuq nəfəsi hələ də yaddaşlarımızdadır.
1980-ci illərin sonları... Xalqımız öz azadlığı və müstəqilliyi uğrunda ayağa qalxmışdı. Sovet rejimi isə bu azadlıq mübarizəsini qanla boğmağa qərar verdi. 1990-cı il yanvarın 19-dan 20-nə keçən gecə sovet ordusu Bakı şəhərinə daxil oldu. Tankların və silahların kölgəsində yüzlərlə günahsız insan şəhid oldu. Həmin gün Azərbaycanın tarixinə qanla yazıldı.
20 Yanvar gecəsi yalnız faciə deyildi. Bu, xalqımızın iradəsini, birlik ruhunu, azadlıq uğrunda mübarizə əzmini dünyaya göstərən bir tarixdir. O gecə şəhid olanlar təkcə canlarını deyil, qəlblərindəki qorxunu da qurban verdilər. Hər biri azadlıq uğrunda canını fəda edərək, gələcək nəsillərə başıuca bir vətən qoyub getdi.
Bu gün Şəhidlər Xiyabanına gedəndə, o müqəddəs məzarların önündə baş əyirik. Lakin onların yalnız adı yox, əməlləri də bizi düşünməyə və dərslər çıxarmağa çağırır. Azadlıq asanlıqla əldə olunmur. Bizim bu gün sərbəst şəkildə danışa bilmək, öz ölkəmizi idarə etmək hüququmuz o gecənin qanlı səhifələri ilə yazıldı.
35 il keçib, amma xalqımız həmin gecəni unutmur, unutmayacaq da. Çünki unutmaq yalnız tarixə deyil, özümüzə də xəyanət deməkdir. Biz bu tarixi xatırlayaraq, gələcək nəsillərə müstəqilliyimizin qiymətini öyrətməliyik.
20 Yanvar bizim həm hüznümüz, həm də qürur günümüzdür. Şəhidlərimizin ruhu qarşısında baş əyərək deyirik: Sizin fədakarlığınız heç vaxt unudulmayacaq. Bu vətən sizin sayənizdə müstəqildir!
Xocalı rayon ziyalısı Elxan Salmanov