Prezident İlham Əliyev 25 sentyabr 2025-ci il tarixində BMT Baş Assambleyasının 80-ci sessiyasında çıxış edərkən artıq intihamların, haqsızlığın və işğal ağrılarının tribunanın arxasında qaldığını bildirdi — onun nitqi yeni mərhələnin elanıdır, zəfər və sülh arasında körpüdür. O, Azərbaycanda illərlə davam edən işğalın sonunu gətirən 2020-ci ilin müharibəsini hüquqi və strateji baxımdan əsaslandırdı və beynəlxalq ictimaiyyətə Azərbaycanın gələcək vizyonunu təqdim etdi.
Prezident çıxışında diqqət çəkdi ki, üç onillik ərzində təxminən iyirmi faiz torpağımız işğal altında qalmışdı, minlərlə vətəndaş yurd-yuvasından didərgin düşmüşdü. O qeyd etdi ki, qəbul olunan BMT Təhlükəsizlik Şurası qətnamələri heç vaxt icra edilməmiş, beynəlxalq platformalar susqunluqla müşahidəçi rolunda qalmışdı.
2020-ci ildə Azərbaycan özünümüdafiə hüququ əsasında fəal addım atdı və 44 günlük müharibə nəticəsində ərazi bütövlüyünü bərpa etdi. İlham Əliyev vurğuladı ki, bu qələbə yalnız silah gücünə dayanmadı, həm də hüquq, diplomatiya və milli iradə ilə təmin olundu.
Nitqdə Ermənistanla münasibətlərdə sülh quruculuğu mərhələsinin başladığına diqqət çəkildi. Dövlət başçısı qeyd etdi ki, 8 avqust 2025-ci ildə Vaşinqtonda Azərbaycan və Ermənistan xarici işlər nazirləri sülh sazişi layihəsini ilkinləşdiriblər və həmin gün Prezident və Baş nazir Birləşmiş Bəyannaməni imzalayıblar. Bu, ikitərəfli, xarici asılılıqdan azad və ədalətli prosesi ifadə edir.
İlham Əliyev regionda kommunikasiyanın açılmasını strateji prioritet elan etdi. “Trump Route for International Peace and Prosperity” (TRIPP) adlı Zəngəzur dəhlizi ideyası çıxışda ön planda idi — bu marşrutun açılması vasitəsilə regionda nəqliyyat, ticarət və inteqrasiya əlaqələri yenidən qurulacaq.
Enerji və iqtisadiyyat sahələri də nitqində mühüm yer tutdu. O bildirdi ki, Azərbaycan artıq bir neçə ölkəyə qaz tədarük edir və enerji diversifikasiyası istiqamətində addımlar atır. Bərpa olunan enerji, investisiya cəlb etmə və iqtisadiyyatın neftdən kənar sahələrinin inkişafı prioritetlərdən biridir.
Prezident həmçinin humanitar və ekoloji məsələlərə toxundu: minalanmış ərazilər, məcburi köçkünlərin təhlükəsiz dönüşünün təşkili, itkin düşənlərin taleyi, infrastrukturun bərpa olunması, həmçinin Xəzər dənizinin ekoloji vəziyyəti ciddi çağırışdır və bu sahədə region ölkələrinin birgə işi vacibdir.
Çıxışını İlham Əliyev belə yekunlaşdırdı: “Biz müharibədə və sülhdə qazandıq. İşğal sona çatdı, yenidənqurma başladı. İndi qarşıda duran məqsəd — davamlı sülh, beynəlxalq hüququ üstün tutan dünyada Azərbaycan rolunu daha da möhkəmləndirməkdir.” O beynəlxalq ictimaiyyətə çağırış etdi ki, ədalət selektiv olmasın, hüquq hamıya bərabər olsun və sülh yalnız sözlə yox, əməl ilə təmin edilsin.
Xocalı rayon ziyalısı Şəhriyar Quliyev