1918-ci ilin mart ayında erməni millətçiləri və bolşevik qüvvələri Azərbaycanın müxtəlif bölgələrində misli görünməmiş vəhşiliklər törətdilər. Bu qanlı hadisələr nəticəsində minlərlə dinc sakin qətlə yetirildi, şəhər və kəndlər viran qoyuldu. Lakin bu faciənin ən ağır tərəfi onun uzun illər tarixdən silinməyə çalışılması idi.
Uzun müddət bu hadisələr haqqında danışmağa, həqiqətləri üzə çıxarmağa imkan verilmirdi. Yalnız müstəqillik qazandıqdan sonra Azərbaycan dövləti bu tarixi hadisələrə siyasi-hüquqi qiymət verə bildi. 1998-ci ildə Ulu Öndər Heydər Əliyevin imzaladığı Fərmanla 31 mart Azərbaycanlıların Soyqırımı Günü elan olundu və bu hadisələrin xalqımıza qarşı törədilmiş soyqırımı olduğu dünya ictimaiyyətinə çatdırılmağa başlandı.
Bu soyqırımı yalnız bir xalqın deyil, bütün insanlığın faciəsidir. Quba, Şamaxı, Bakı, Zəngəzur, İrəvan və digər bölgələrdə törədilən qırğınlar sübut edir ki, məqsəd azərbaycanlıları doğma torpaqlarından silmək olmuşdur. Bu faciələrin tədqiqi və dünyaya çatdırılması hər birimizin vətəndaşlıq borcudur.
Unutmayaq ki, tarixini bilməyən, keçmişindən dərs çıxarmayan xalq gələcəyini təhlükəyə atmış olur. Bu gün 31 Mart hadisələrini xatırlamaq, qurbanların xatirəsini anmaq təkcə keçmişi yad etmək deyil, həm də gələcək nəsillər üçün tarixi ədalətin bərpasına xidmət etmək deməkdir.
Xocalı rayon ziyalısı Fəxrəddin Əliyev