Prezident İlham Əliyevin ABŞ-a səfəri, Vaşinqtonda baş tutan görüşlər və əldə olunan razılaşmalar iki ölkə münasibətlərində yeni bir mərhələnin başlanğıcı kimi qiymətləndirilir. Ağ Evdə aparılan müzakirələr nəticəsində Azərbaycan və ABŞ arasında strateji tərəfdaşlıq əlaqələrinin gücləndirilməsi üçün xüsusi Strateji İşçi Qrupunun yaradılması qərara alındı. Altı ay ərzində hazırlanacaq Strateji Tərəfdaşlıq Xartiyası enerji resurslarının təhlükəsiz daşınması, ticarət əlaqələrinin genişləndirilməsi, tranzit imkanlarının artırılması, süni intellekt və rəqəmsal infrastruktur sahələrində əməkdaşlıq, həmçinin müdafiə və təhlükəsizlik məsələlərini əhatə edəcək.
Səfər çərçivəsində verilən ən mühüm qərarlardan biri isə uzun illər Azərbaycanın maraqlarına zidd şəkildə qüvvədə qalmış 907-ci düzəlişin ləğvi oldu. Prezident İlham Əliyev bu addımı tarixi ədalətin bərpası kimi qiymətləndirdi. Xüsusilə, bu prosesdə keçmiş ABŞ prezidenti Donald Trampın rolunu vurğulayaraq, onun Nobel Sülh Mükafatına namizəd göstərilməsinin vaxtının çatdığını bildirdi. Bu, eyni zamanda Azərbaycan–ABŞ münasibətlərində qarşılıqlı etimadın möhkəmlənməsinə mühüm təsir göstərən qərar kimi dəyərləndirilir.
Vaşinqton görüşlərində regional təhlükəsizlik və sülh prosesi də əsas gündəm mövzusu oldu. Azərbaycan və Ermənistan arasında sülh sazişinin paraflanması istiqamətində atılacaq addımlar müzakirə edildi. Prezident İlham Əliyev qeyd etdi ki, bu proses təkcə iki ölkə arasında deyil, bütün Cənubi Qafqazda sabitlik və inkişaf üçün vacib şərtdir.
Ümumilikdə, ABŞ səfəri göstərdi ki, iki ölkə münasibətləri yeni strateji müstəviyə keçib. Qarşılıqlı etimad və ortaq maraqlar üzərində qurulan bu əməkdaşlıq Azərbaycanın beynəlxalq mövqelərinin möhkəmlənməsinə, regionun isə davamlı sülh və iqtisadi inkişaf perspektivlərinə mühüm töhfə verəcək.
Xocalı rayon ziyalısı Elçin Mehralıyev