Prezident İlham Əliyevin 2025-ci ilin idman yekunlarına həsr olunan mərasimdə çıxışı ölkəmizdə idmanın inkişafının hansı mərhələyə çatdığını, bu sahənin artıq təkcə idman uğurları deyil, eyni zamanda dövlət siyasətinin, milli gücün və beynəlxalq nüfuzun ayrılmaz tərkib hissəsinə çevrildiyini bir daha nümayiş etdirdi. Dövlət başçısı çıxışında vurğuladı ki, 2025-ci il Azərbaycan idmanı üçün rekordlarla yadda qalıb. İdmançılarımız beynəlxalq arenalarda 2000-dən artıq medal, o cümlədən 600-dən çox qızıl medal qazanaraq tarixi nəticəyə imza atıblar. Keçən illə müqayisədə medalların sayının artması ölkədə idmana göstərilən davamlı diqqətin, düzgün qurulmuş dövlət siyasətinin və uzunmüddətli strategiyanın real nəticəsidir. Bu göstəricilər bir daha sübut edir ki, Azərbaycanda idman təsadüfi uğurlarla deyil, sistemli yanaşma və ardıcıl inkişaf yolu ilə irəliləyir.

Prezident İlham Əliyev xüsusi qeyd etdi ki, idmanın inkişafı Azərbaycanda dövlət siyasətinin prioritet istiqamətlərindən biridir. Məhz bu siyasətin nəticəsi olaraq ölkədə idman infrastrukturu faktiki olaraq sıfırdan qurulub və bu gün ən yüksək standartlara cavab verir. Paytaxtla yanaşı, bölgələrdə də idmanla məşğul olmaq üçün hərtərəfli şərait yaradılıb. 2025-ci ildə Gəncə və Yevlax şəhərlərində Olimpiya İdman komplekslərinin istifadəyə verilməsi bu siyasətin uğurlu davamıdır və bununla da bölgələrdə fəaliyyət göstərən Olimpiya İdman komplekslərinin sayı 46-ya çatıb. Bu infrastruktur təkcə peşəkar idmançıların deyil, eyni zamanda minlərlə gəncin idmana cəlb olunmasına, sağlam həyat tərzinin formalaşmasına xidmət edir.

Dövlət başçısı çıxışında sağlam gənc nəslin yetişdirilməsinin ölkənin gələcək inkişafı baxımından mühüm əhəmiyyət daşıdığını xüsusi vurğuladı. Onun fikrincə, idman uğurlarının təməlində sağlam, fiziki cəhətdən möhkəm və mənəvi cəhətdən güclü gənclik dayanır. Uşaqlıqdan idmana marağın formalaşdırılması gələcəkdə böyük nailiyyətlərin əldə olunmasına yol açır. Bu yanaşma təkcə idman nəticələri üçün deyil, bütövlükdə Azərbaycan cəmiyyətinin sağlam, dinamik və dayanıqlı inkişafı üçün vacibdir. Prezident İlham Əliyev qeyd etdi ki, gənclərin fiziki sağlamlığı ilə yanaşı, onların mənəvi tərbiyəsi də xüsusi əhəmiyyət daşıyır.

Çıxışda gənclərin vətənpərvərlik ruhunda tərbiyəsi məsələsinə də geniş yer verildi. Prezident bildirdi ki, sağlam ruhlu, Vətənə bağlı gənclər ölkənin əbədi inkişafının əsas təminatıdır. Son illərdə cəmiyyətdə hökm sürən həmrəylik və vətənpərvərlik mühiti bu siyasətin düzgünlüyünü təsdiqləyir. Gənclərin həm fiziki hazırlığı, həm də mənəvi saflığı bir vəhdət təşkil etməlidir. İdman isə bu vəhdətin formalaşmasında xüsusi rol oynayır, gənclərdə intizam, məsuliyyət, mübarizlik və Vətən sevgisi kimi dəyərləri möhkəmləndirir.

Prezident İlham Əliyev vurğuladı ki, idmançılarımız beynəlxalq yarışlarda Azərbaycan Dövlət Bayrağını qaldırarkən hər bir vətəndaş qürur hissi keçirir. Son beş il ərzində Azərbaycanın bayrağı qalib ölkənin bayrağı kimi dünya arenalarında dalğalanır. Bu reallıq idmançıların üzərinə böyük məsuliyyət qoyur, çünki onlar müzəffər xalqın nümayəndələri kimi çıxış edirlər. Şanlı Qələbədən sonra idmançılarımızın beynəlxalq arenada nümayiş etdirdiyi ruh yüksəkliyi və məsuliyyət hissi Azərbaycanın gücünü və birliyini əks etdirir.

2025-ci ilin mühüm idman hadisələrindən biri də MDB ölkələrinin üçüncü Oyunlarının Azərbaycanda yüksək səviyyədə keçirilməsi oldu. Bu Oyunların bir neçə şəhərdə, o cümlədən Gəncə və Xankəndidə təşkili ölkəmizin geniş imkanlarını və bölgələrin inkişaf səviyyəsini nümayiş etdirdi. Minlərlə xarici qonağın iştirak etdiyi bu yarışlar Azərbaycanın qonaqpərvərliyini, müasir infrastrukturunu və təşkilati bacarığını bir daha dünyaya göstərdi. İdmançılarımızın bu Oyunlarda komanda hesabında ikinci yerə layiq görülməsi ölkə idmanının yüksək potensialının göstəricisidir.

Prezident çıxışında bu il ölkəmizdə ilk dəfə keçirilən UFC beynəlxalq turnirini də xüsusi qeyd etdi. Dünyanın ən populyar idman yarışlarından biri olan UFC-nin Bakıda keçirilməsi Azərbaycanın qlobal idman xəritəsində mövqeyinin daha da möhkəmləndiyini göstərir. Bu cür yarışlar təkcə idman hadisəsi deyil, eyni zamanda ölkənin beynəlxalq imicinin güclənməsinə xidmət edən mühüm platformadır. Dünya mediasının diqqət mərkəzində olan bu turnir Azərbaycanın müasir, inkişaf etmiş və təhlükəsiz ölkə olduğunu bir daha nümayiş etdirdi.

Formula 1 yarışlarının da ölkəmizin tanıdılmasında xüsusi rol oynadığı vurğulandı. Prezident İlham Əliyev qeyd etdi ki, ilk Formula 1 yarışından sonra Azərbaycana gələn xarici turistlərin sayında 20 faiz artım müşahidə olunub və bu artım pandemiyaya qədər davam edib. 2025-ci ildə keçirilən yarışın bütün biletlərinin əvvəlcədən satılması, on minlərlə tamaşaçının canlı iştirak etməsi və yarışın yarım milyardlıq auditoriyaya malik olması Bakının dünya miqyasında tanıdılmasına böyük töhfə verib. Şəhər yarışlarının fərqli formatı Bakını bu sahədə nümunəvi şəhərlərdən birinə çevirib.

Dövlət başçısı gələcək planlardan danışarkən ölkəmizdə ilk dəfə keçiriləcək Xizək üzrə Dünya Kubokunu xüsusi vurğuladı. Qusarda, Şahdağ Xizək Kurortunda təşkil olunacaq bu yarış Azərbaycanı beynəlxalq qış idmanları təqviminə daxil edir. Şahdağ Turizm Xizək Mərkəzinin davamlı inkişafı, yeni trasların istifadəyə verilməsi, minlərlə iş yerinin yaradılması regionun sosial-iqtisadi inkişafına mühüm töhfə verir. Bununla yanaşı, Qarabağ və Şərqi Zəngəzurda yaradılan yeni infrastruktur, su anbarlarında keçirilən və planlaşdırılan yarışlar ölkənin idman potensialının daha da genişləndiyini göstərir.

Prezident İlham Əliyev çıxışının sonunda Bakı şəhərinin “Dünyanın İdman Paytaxtı” seçilməsini böyük tarixi hadisə kimi dəyərləndirdi. Bu titul Azərbaycanda idmanın inkişafına verilən yüksək beynəlxalq qiymətdir və ölkəmizin bu adı ləyaqətlə daşıyacağına əminlik ifadə olundu. İdmançıların və idman mütəxəssislərinin mükafatlandırılmasının artıq uzun illərdir davam edən ədalətli bir ənənəyə çevrildiyini vurğulayan dövlət başçısı bildirdi ki, Azərbaycanın idman şöhrətini ucaldan insanlar hər zaman dövlətin diqqət və qayğısı ilə əhatə olunmalıdır. Prezidentin bu çıxışı bir daha göstərdi ki, Azərbaycan idmanı güclü dövlət siyasəti, sağlam gənclik və milli həmrəylik üzərində qurularaq gələcəyə inamla addımlayır.

Xocalı rayon ziyalısı Ziya Əliyev