Azərbaycan Dövlət Bayrağı, yalnız bir dövlət atributu olmaqla kifayətlənmir, həm də millətin vətəndaşlarının milli birliyinin, həmrəyliyinin və "azərbaycançılıq" məfkurəsinin əsas simvoludur. Bayraq, həm də xalqımızın müstəqil dövlətə sahib çıxmaq bacarığını və onun müstəqilliyinə olan dərin sədaqətini təmsil edir. Ulu Öndər Heydər Əliyevin sözləri ilə desək: "Bizim bayrağımız qürur mənbəyimizdir, o bizim vətənimizə olan sevgi və məhəbbətin rəmzidir." Bayraq, Azərbaycanın hər bir vətəndaşının içindəki vətən sevgisini, onun milli mənsubiyyətini, dövlətə olan hörmətini əks etdirir.
Bayrağımıza olan bu sevgi, onun yalnız dövlət orqanlarında deyil, hər bir evdə və hər bir Azərbaycan vətəndaşının həyatının bir hissəsi olmasına da təkan verir. Dövlət Bayrağı Günü, millətimizin hər bir fərdinin bu müqəddəs rəmzi dərk etməsi və onun əhəmiyyətini gələcək nəsillərə ötürməsi üçün mühüm bir fürsət yaradır. Bayrağımızın dalğalanması, həm də Azərbaycanın müstəqilliyinin və dövlətçiliyinin əbədi olduğunu göstərir.
Fəxrəddin Əliyev,
Xocalı rayon ziyalısı