Bəzi tarixlər var ki, təqvimdə sadəcə bir gün olaraq qalmır. O tarix xalqın yaddaşına, insanların həyatına və gələcək nəsillərin xatirəsinə yazılır. 27 Sentyabr da Azərbaycan xalqı üçün belə günlərdən biridir. Bu günü xatırlayanda ilk növbədə Vətən uğrunda canını fəda edən şəhidlərimiz yada düşür.

Uzun illər Qarabağ həsrəti ilə yaşayan minlərlə insanımız vardı. Doğma evini, kəndini, ata-baba yurdunu tərk etməyə məcbur olmuş insanlar illərlə bir gün geri qayıdacaqlarına ümid etdilər. Qarabağ haqqında danışanda onların gözlərində həm kədər, həm də qayıdış ümidi görünürdü. Bu həsrət illərlə davam etsə də, Azərbaycan xalqı öz torpaqlarının azad ediləcəyinə inamını heç vaxt itirmədi.

2020-ci il sentyabrın 27-də Ermənistan silahlı qüvvələrinin hərbi təxribatından sonra Azərbaycan Ordusu əks-hücuma başladı. Bununla da 44 günlük Vətən müharibəsinin ilk günü tarixə yazıldı. Döyüşlər davam etdikcə Azərbaycan Ordusu irəlilədi, şəhər və kəndlərimiz azad edildi. Noyabrın 8-də Şuşanın azad olunması isə xalqımıza böyük qürur və sevinc yaşatdı. Müharibə Azərbaycanın tarixi Qələbəsi ilə başa çatdı.

O 44 günü yaşamış hər kəs həmin günlərin necə böyük həyəcanla keçdiyini yaxşı xatırlayır. Cəbhədən gələn hər bir uğurlu xəbər insanlarda sevinc yaradırdı. Azərbaycan xalqı ordusunun yanında olduğunu hər addımda göstərirdi. İnsanları bir fikir birləşdirirdi: torpaqlarımız azad edilməli və üçrəngli bayrağımız yenidən doğma yurdlarımızda dalğalanmalıdır.

Bu böyük Qələbə üçün ən ağır bədəli şəhidlərimiz ödədilər. Onlar öz həyatlarından keçərək Vətən qarşısında ən böyük xidmət göstərdilər. Hər bir şəhidin arxasında gözü yolda qalan bir ana, ata, həyat yoldaşı, övlad, bacı və qardaş var. Ona görə də şəhidlərimizi yad etmək yalnız keçmişi xatırlamaq deyil, onların ailələrinə və bizə əmanət etdikləri Vətənə sahib çıxmaq deməkdir.

Bu gün vaxtilə həsrətlə adı çəkilən torpaqlarda Azərbaycan Bayrağı dalğalanır. İnsanlarımız doğma yurdlarına qayıdır, azad edilmiş şəhər və kəndlərdə həyat yenidən qurulur. Bütün bunların arxasında əsgər və zabitlərimizin qəhrəmanlığı, şəhidlərimizin fədakarlığı dayanır.

Prezident İlham Əliyevin 2 dekabr 2020-ci il tarixli Sərəncamı ilə sentyabrın 27-si ölkəmizdə Anım Günü kimi qeyd olunur. Hər il həmin gün saat 12:00-da Azərbaycanın bütün ərazisində şəhidlərimizin əziz xatirəsi bir dəqiqəlik sükutla yad edilir.

27 Sentyabr bizə bir həqiqəti daim xatırladır: Vətən uğrunda göstərilən qəhrəmanlıq unudulmur. Bu gün bizim borcumuz şəhidlərimizin xatirəsini yaşatmaq, onların keçdiyi şərəfli yolu övladlarımıza danışmaq və bizə əmanət edilən torpaqları qorumaqdır.

İllər keçəcək, nəsillər dəyişəcək, amma 27 Sentyabr və bu tarixdən başlayan qəhrəmanlıq yolu xalqımızın yaddaşından heç vaxt silinməyəcək. Şəhidlərimizin adı hər zaman böyük hörmət, qürur və minnətdarlıqla çəkiləcək.

Allah bütün şəhidlərimizə rəhmət eləsin!