İlham Əliyevin Gürcüstana son səfəri zamanı səsləndirdiyi fikirlər bir daha göstərdi ki, Azərbaycan–Gürcüstan münasibətləri regionda sabitliyin və inkişafın əsas sütunlarından biridir. Bu əlaqələr təkcə siyasi və iqtisadi maraqlarla məhdudlaşmır, eyni zamanda xalqlar arasında formalaşmış dərin etimad və qarşılıqlı hörmətə söykənir. Əsrlər boyu davam edən dostluq ənənələri bu gün dövlətlərarası münasibətlərdə özünün ən yüksək səviyyəsini tapıb.

Səfər çərçivəsində vurğulanan əsas məqamlardan biri Gürcüstanın dinamik inkişafı və əlverişli investisiya mühiti oldu. Azərbaycan tərəfi bu inkişafı yüksək qiymətləndirərək, ölkələr arasında iqtisadi əməkdaşlığın daha da genişlənməsi üçün böyük potensialın mövcud olduğunu qeyd etdi. Azərbaycan sərmayəsinin Gürcüstan iqtisadiyyatındakı payı, artan ticarət dövriyyəsi və yeni layihələrə maraq iki ölkənin iqtisadi baxımdan bir-birini tamamladığını açıq şəkildə nümayiş etdirir.

Bununla yanaşı, Azərbaycan və Gürcüstan beynəlxalq platformalarda da vahid mövqedən çıxış edərək bir-birinin milli maraqlarını daim müdafiə edir. Bu amil münasibətlərin etibarlılığını artırmaqla yanaşı, regionda siyasi sabitliyin qorunmasına da mühüm töhfə verir. Xüsusilə suverenlik və ərazi bütövlüyü məsələlərində göstərilən qarşılıqlı dəstək tərəfdaşlığın prinsipial əsaslarını təşkil edir.

Bugünkü reallıqda Cənubi Qafqaz regionu yeni inkişaf mərhələsinə qədəm qoyur. Keçmişdə münaqişələrlə yadda qalan bu coğrafiya artıq əməkdaşlıq və dialoq məkanına çevrilməkdədir. Bu prosesdə Azərbaycan və Gürcüstanın birgə fəaliyyəti xüsusi əhəmiyyət daşıyır. Regional sülhün möhkəmləndirilməsi üçün iqtisadi əlaqələrin, xüsusilə ticarətin genişləndirilməsi vacib amil kimi önə çıxır.

Enerji və nəqliyyat sahəsində həyata keçirilən iri layihələr bu əməkdaşlığın strateji mahiyyətini daha da gücləndirir. Bakı-Tbilisi-Ceyhan neft kəməri və Cənub Qaz Dəhlizi kimi təşəbbüslər yalnız iki ölkə üçün deyil, geniş region üçün mühüm əhəmiyyət daşıyır. Eyni zamanda Orta Dəhliz vasitəsilə Asiya ilə Avropanı birləşdirən nəqliyyat imkanları genişlənir və bu da Azərbaycanla Gürcüstanın strateji rolunu daha da artırır.

Ümumilikdə, Prezident İlham Əliyevin səfəri və səsləndirdiyi mesajlar göstərir ki, Azərbaycan–Gürcüstan münasibətləri gələcəyə hesablanmış, möhkəm təmələ əsaslanan və daim inkişaf edən bir tərəfdaşlıq nümunəsidir. Bu əməkdaşlıq modeli regionda sülhün, təhlükəsizliyin və rifahın təmin olunması baxımından mühüm rol oynamaqda davam edəcək.

Xocalı rayon ziyalısı Ziya Əliyev