İqtisadi əməkdaşlıq və enerji təhlükəsizliyi: Azərbaycan–Çexiya tərəfdaşlığının əsas istiqamətləri.

Azərbaycan ilə Çexiya arasında iqtisadi əməkdaşlıq son illərdə dinamik inkişaf mərhələsinə qədəm qoymuşdur. Prezident İlham Əliyevin bəyanatında qeyd edildiyi kimi, artıq iki ölkə arasında ticarət dövriyyəsi 800 milyon ABŞ dollarını keçmişdir. Bu isə iqtisadi əlaqələrin genişlənməsinin bariz göstəricisidir.

Lakin dövlət başçısı xüsusi vurğulamışdır ki, mövcud ticarət dövriyyəsinin əsas hissəsini enerji resurslarının, xüsusilə də neftin ixracı təşkil edir. Bu baxımdan qarşıda duran əsas məqsəd iqtisadi əməkdaşlığın daha şaxələndirilmiş və balanslı şəkildə inkişaf etdirilməsidir. Bu istiqamətdə biznes forumların təşkili, sahibkarlar arasında əlaqələrin qurulması və investisiya layihələrinin həyata keçirilməsi mühüm rol oynayacaq.

Energetika sahəsi isə Azərbaycan–Çexiya münasibətlərinin əsas sütunlarından biri olaraq qalır. Azərbaycan nefti uzun illərdir ki, Çexiyanın enerji balansında mühüm yer tutur. Bu, Azərbaycanın beynəlxalq enerji bazarında etibarlı tərəfdaş kimi mövqeyini daha da möhkəmləndirir. Bu mövqe Avropa İttifaqı tərəfindən də yüksək qiymətləndirilir.

Bundan əlavə, Azərbaycanın təbii qaz ixracı coğrafiyası genişlənməkdədir. Hal-hazırda Azərbaycan qazı 16 ölkəyə ixrac olunur ki, onların 10-u Avropa İttifaqına üzv ölkələrdir. Bu fakt Azərbaycanın Avropanın enerji təhlükəsizliyində mühüm rol oynadığını bir daha təsdiq edir.

Gələcəkdə enerji sahəsində əməkdaşlığın daha da genişləndirilməsi, yeni layihələrin həyata keçirilməsi və alternativ enerji mənbələrinin inkişafı istiqamətində birgə addımların atılması gözlənilir. Bu isə Azərbaycan və Çexiya arasında iqtisadi tərəfdaşlığın daha da möhkəmlənməsinə xidmət edəcəkdir.

Xocalı rayon ziyalısı Aqil Məmmədov.