6 oktyabr 2025-ci il – Konstitusiya və Suverenlik İli çərçivəsində Xocalı rayon İcra Hakimiyyətinin əməkdaşları, şəhid ailələrinin üzvləri, eləcə də rayonun idarə və təşkilat nümayəndələri Bərdə və Ağcabədi rayonlarına səfər edərək, orada dəfn olunmuş Xocalı faciəsi və Vətən müharibəsi şəhidlərinin məzarlarını ziyarət ediblər.

Ziyarət zamanı şəhidlərin əziz xatirəsi ehtiramla yad olunub, məzarların üzərinə tər gül dəstələri qoyulub. İştirakçılar Vətən uğrunda canlarını fəda etmiş qəhrəmanların ruhu qarşısında baş əyib, Azərbaycanın azadlığı, suverenliyi və ərazi bütövlüyü naminə şəhid olmuş igid övladlarımızın xidmətlərinin heç vaxt unudulmayacağını bildiriblər.

Tədbir iştirakçıları vurğulayıblar ki, 2025-ci ilin “Konstitusiya və Suverenlik İli” elan olunması dövlətimizin müstəqilliyinin, milli dəyərlərimizin və vətəndaş həmrəyliyinin təntənəsidir. Şəhidlərimizin canı bahasına qorunan bu dəyərlərin möhkəmləndirilməsi, onların əziz xatirəsinin uca tutulması hər bir vətəndaşın mənəvi borcudur.

Ziyarət çərçivəsində Xocalı rayon İcra Hakimiyyətinin nümayəndələri həmçinin şəhid ailələrinin evlərinə də baş çəkiblər. Şəhid ailələrinin üzvləri ilə səmimi görüşlər keçirilib, onların sosial vəziyyəti, qayğı və ehtiyacları ilə maraqlanılıb. Görüş zamanı bildirilib ki, ölkə rəhbərliyinin diqqət və qayğısı sayəsində şəhid ailələrinin sosial rifahının yaxşılaşdırılması, mənzil və digər sosial məsələlərinin həlli istiqamətində mühüm addımlar atılır.

Şəhid ailələri dövlətin onlara göstərdiyi daimi diqqət və qayğıya görə minnətdarlıqlarını ifadə ediblər. Onlar qeyd ediblər ki, övladlarının müqəddəs Vətən torpaqları uğrunda qəhrəmancasına şəhid olmaları həm ailələri, həm də bütün Azərbaycan xalqı üçün böyük qürur mənbəyidir.

Tədbir sonda Bərdə və Ağcabədi rayonlarında yerləşən şəhidlər xiyabanlarında davam edib. Burada şəhidlərin xatirəsinə dualar oxunub, vətənpərvərlik ruhunda çıxışlar edilib.

Bu ziyarət, həm Konstitusiya və Suverenlik İli çərçivəsində keçirilən tədbirlərin davamı, həm də şəhidlərimizin xatirəsinə olan sonsuz ehtiramın bariz göstəricisidir. Xocalı rayon İcra Hakimiyyəti gələcəkdə də bu kimi mənəvi əhəmiyyətli tədbirlərin mütəmadi keçirilməsini planlaşdırır.