8 Noyabr Azərbaycan xalqının yaddaşına qızıl hərflərlə yazılmış tarixi gündür. 2020-ci ilin məhz bu günündə qəhrəman Azərbaycan Ordusu Şuşanı işğaldan azad edərək xalqımıza unudulmaz sevinc yaşatdı. Uzun illər həsrətində olduğumuz doğma torpaqlarımızın azad olunması hər bir azərbaycanlının qəlbində böyük qürur hissi yaratdı.

Şuşanın azad edilməsi asan başa gəlmədi. İgid əsgər və zabitlərimiz sıldırım qayaları aşaraq, çətin dağ yollarından keçərək düşmənə qarşı qəhrəmancasına döyüşdülər. Onların göstərdiyi şücaət xalqımızın Vətənə olan sevgisinin və torpaqlarımız uğrunda mübarizə əzminin ən böyük nümunəsidir.

Prezident, Müzəffər Ali Baş Komandan İlham Əliyevin rəhbərliyi ilə qazanılan bu qələbə Azərbaycanın gücünü bütün dünyaya göstərdi. Xalqımız bir yumruq kimi birləşərək tarixi ədalətin bərpasına nail oldu.

Bu gün Şuşada üçrəngli bayrağımızın dalğalanması hər birimiz üçün sonsuz xoşbəxtlikdir. Biz bu qələbəni bizə yaşadan şəhidlərimizin əziz xatirəsini daim uca tutur, qazilərimizə minnətdarlığımızı bildiririk. Şuşa bizim qürurumuz, Zəfərimizin rəmzidir.