Xocalı rayon İcra Hakimiyyəti, Xocalı rayon Polis şöbəsi və “Xocalı Rayon Mərkəzi Xəstəxanası” publik hüquqi şəxsin birgə təşkilatçılığı ilə Azərbaycan Respublikası Prezidentinin 22 iyul 2022-ci il tarixli, 3378 nömrəli Sərəncamı ilə təsdiq edilmiş “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın 3.3.7.2-ci bəndinin icrası məqsədilə 2025-ci il sentyabr ayının 18-də Xocalı rayonunun müxtəlif kateqoriyadan zərərçəkmiş ailələrinin məskunlaşdığı Goranboy rayonu Aşağı Ağcakənd qəsəbəsində növbəti maarifləndirici tədbir keçirilmişdir.

Tədbir Xocalı şəhər 4 saylı kənd tam orta məktəbinin akt zalında təşkil olunmuş və görüşdə məktəbin pedaqoji kollektivi, şagirdlər, valideynlər, eləcə də müvafiq dövlət qurumlarının nümayəndələri iştirak etmişdir.

Görüş zamanı Strategiyanın 3.3.7.2-ci bəndində nəzərdə tutulan — uşaqlar və gənclər arasında sağlamlıq mədəniyyətinin artırılması, zərərli vərdişlərin qarşısının alınması, erkən nikah, uşaqların təhlükəsizliyi, internet və sosial şəbəkələrin düzgün istifadəsi, eləcə də ailədaxili münaqişələrin qarşısının alınması üzrə maarifləndirmə tədbirlərinin genişləndirilməsi mövzuları diqqət mərkəzində olub.

Tədbirdə çıxış edənlər:

Polis əməkdaşları yeniyetmələr arasında hüquq pozuntularının qarşısının alınması, kibertəhlükəsizlik və ictimai təhlükəsizlik qaydaları barədə məlumat veriblər;

Xocalı Rayon Mərkəzi Xəstəxanasının həkimləri sağlam həyat tərzi, psixoloji sağlamlıq, düzgün gündəlik rejim üçün tövsiyələr təqdim ediblər;

Xocalı rayon İcra Hakimiyyətinin nümayəndələri Strategiyanın sosial istiqamətləri barədə məlumatları çatdırıblar və maarifləndirici işlərin davamlı xarakter daşıdığını vurğulayıblar.

Görüş interaktiv şəkildə davam etmiş, şagird və valideynlər mövzular üzrə suallar ünvanlamış, iştirakçılara xüsusi maarifləndirici bukletlər paylanmışdır.

Sonda bildirilib ki, bu kimi tədbirlər Xocalı rayonunun müxtəlif məktəblərində mərhələli şəkildə davam etdiriləcək.