15 İyun – Milli Qurtuluş Günü: Azərbaycanın Taleyini Dəyişən Dönüş Nöqtəsi.

“Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır.” Bu sözlər Ulu Öndər Heydər Əliyevin Azərbaycan dövlətçiliyinə və xalqına olan sonsuz sədaqətinin ifadəsidir. Məhz bu sədaqət və uzaqgörən siyasət nəticəsində Azərbaycan ən çətin sınaqlardan çıxaraq müstəqilliyini qorumuş, inkişaf və tərəqqi yoluna qədəm qoymuşdur.

1990-cı illərin əvvəlləri Azərbaycan üçün olduqca mürəkkəb və ağır dövr idi. Müstəqilliyini yenicə bərpa etmiş ölkədə siyasi qeyri-sabitlik hökm sürür, iqtisadi vəziyyət getdikcə ağırlaşır, Ermənistanın hərbi təcavüzü nəticəsində torpaqlar işğal olunurdu. Hakimiyyət böhranı, daxili qarşıdurmalar və idarəetmədəki problemlər dövlətçiliyin gələcəyini ciddi təhlükə altında qoymuşdu. Xalq çıxış yolunu ölkəyə rəhbərlik etmək təcrübəsinə malik olan Heydər Əliyevin yenidən siyasi hakimiyyətə qayıdışında görürdü.

1993-cü ilin iyun hadisələri Azərbaycanın taleyində həlledici rol oynadı. Xalqın təkidli tələbi ilə Bakıya qayıdan Heydər Əliyev 15 iyun 1993-cü ildə Azərbaycan Respublikası Ali Sovetinin Sədri seçildi. Bu tarix ölkənin siyasi həyatında dönüş nöqtəsinə çevrildi. Ulu Öndərin hakimiyyətə qayıdışı ilə vətəndaş qarşıdurmasının qarşısı alındı, dövlət idarəçiliyində sabitlik təmin edildi və Azərbaycanın müstəqilliyinin qorunması istiqamətində mühüm addımlar atıldı.

Heydər Əliyevin rəhbərliyi altında ölkədə genişmiqyaslı islahatlara başlanıldı. Dövlət quruculuğu prosesi sürətləndirildi, hüquqi və demokratik institutların formalaşdırılması istiqamətində mühüm işlər görüldü. Azərbaycanın beynəlxalq əlaqələri genişləndi, xarici siyasətdə milli maraqlara əsaslanan strateji xətt müəyyən edildi. 1994-cü ildə imzalanan “Əsrin müqaviləsi” ölkənin iqtisadi inkişafının əsasını qoyaraq Azərbaycanın dünya enerji bazarında mövqeyini möhkəmləndirdi.

Milli Qurtuluş Günü yalnız keçmişin deyil, həm də bugünkü uğurlarımızın başlanğıcıdır. Məhz həmin dövrdə yaradılmış siyasi sabitlik və güclü dövlətçilik ənənələri sonrakı inkişafın əsasını təşkil etdi. Bu siyasətin uğurla davam etdirilməsi nəticəsində Azərbaycan regionun aparıcı dövlətlərindən birinə çevrildi, iqtisadi və hərbi gücünü artırdı, beynəlxalq nüfuzunu möhkəmləndirdi.

Bu gün Azərbaycan xalqı 15 İyun – Milli Qurtuluş Gününü böyük ehtiram və minnətdarlıq hissi ilə qeyd edir. Bu tarix xalqımızın birliyinin, dövlətçiliyə sədaqətinin və milli həmrəyliyinin təcəssümüdür. Milli Qurtuluş Günü Azərbaycanın müstəqil dövlət kimi yaşamasını təmin edən mühüm tarixi hadisə olmaqla yanaşı, gələcək nəsillər üçün də vətənpərvərlik və dövlətçilik nümunəsi olaraq qalacaqdır.

Xocalı rayon ziyalısı Ziya Əliyev.