Prezident İlham Əliyevin 2025-ci ilin idman yekunlarına həsr olunmuş mərasimdə çıxışı Azərbaycan idmanının artıq yeni inkişaf mərhələsinə qədəm qoyduğunu aydın şəkildə nümayiş etdirdi. Dövlət başçısının çıxışı idmanın ölkədə təkcə fiziki fəaliyyət sahəsi deyil, eyni zamanda gənclərin tərbiyəsi, milli birliyin möhkəmləndirilməsi və Azərbaycanın beynəlxalq mövqelərinin gücləndirilməsi baxımından strateji əhəmiyyət daşıdığını bir daha təsdiqlədi.

2025-ci il Azərbaycan idmanı üçün tarixi nailiyyətlərlə yadda qaldı. İdmançılarımız beynəlxalq yarışlarda 2000-dən artıq medal, o cümlədən 600-dən çox qızıl medal qazanaraq rekord nəticə əldə etdilər. Bu uğurlar idman sahəsində aparılan ardıcıl dövlət siyasətinin, yaradılan müasir şəraitin və idmançılara göstərilən davamlı diqqətin real nəticəsidir. Medalların sayında müşahidə olunan artım ölkəmizin idman potensialının ildən-ilə gücləndiyini açıq şəkildə ortaya qoyur.

Prezident İlham Əliyev çıxışında vurğuladı ki, Azərbaycanda idmanın inkişafı dövlət siyasətinin prioritet istiqamətlərindən biridir. Son illər ərzində ölkədə idman infrastrukturu köklü şəkildə yenilənmiş, paytaxtla yanaşı bölgələrdə də ən müasir tələblərə cavab verən idman obyektləri inşa olunmuşdur. 2025-ci ildə Gəncə və Yevlax şəhərlərində Olimpiya İdman komplekslərinin istifadəyə verilməsi bu siyasətin davamlı xarakter daşıdığını göstərir. Bununla da bölgələrdə fəaliyyət göstərən Olimpiya İdman komplekslərinin sayı 46-ya çatmışdır ki, bu da regionlarda idmana marağın artmasına və yeni idmançı nəslinin yetişməsinə mühüm töhfə verir.

Dövlət başçısı sağlam gənc nəslin formalaşdırılmasını ölkənin gələcək inkişafı üçün əsas amillərdən biri kimi qiymətləndirdi. Onun sözlərinə görə, idman yalnız nəticələr deyil, eyni zamanda sağlam həyat tərzinin təbliği, gənclərin fiziki və mənəvi inkişafı deməkdir. Uşaqlıqdan idmana göstərilən maraq gələcək uğurların təməlini təşkil edir və bu yanaşma Azərbaycan cəmiyyətinin ümumi sağlamlıq səviyyəsinin yüksəlməsinə xidmət edir.

Prezident İlham Əliyev gənclərin vətənpərvərlik ruhunda tərbiyəsinin idman vasitəsilə daha da gücləndiyini xüsusi qeyd etdi. İdman gənclərdə iradə, məsuliyyət və Vətənə bağlılıq hissini formalaşdırır. Son illərdə xalqımızın nümayiş etdirdiyi həmrəylik və milli birlik bu siyasətin səmərəli olduğunu göstərir. Gənclərin həm fiziki hazırlığı, həm də mənəvi saflığı ölkənin güclü və davamlı inkişafının əsas şərti kimi qiymətləndirildi.

Çıxışda idmançılarımızın beynəlxalq yarışlarda Azərbaycan Dövlət Bayrağını qaldırmasının xalqımız üçün böyük qürur mənbəyi olduğu vurğulandı. Son beş il ərzində əldə olunan tarixi Qələbədən sonra idmançılarımız beynəlxalq arenaya müzəffər xalqın nümayəndələri kimi çıxış edirlər. Bu status onların məsuliyyətini daha da artırır və yarışlarda nümayiş etdirdikləri yüksək ruh halı Azərbaycanın gücünü və inamını əks etdirir.

2025-ci ildə ölkəmizdə keçirilmiş mühüm beynəlxalq idman tədbirləri də Prezident İlham Əliyevin çıxışında xüsusi yer aldı. MDB ölkələrinin üçüncü Oyunlarının bir neçə şəhərdə, o cümlədən Gəncə və Xankəndidə yüksək səviyyədə təşkili Azərbaycanın böyük təşkilati potensiala malik olduğunu göstərdi. Minlərlə xarici qonağın iştirak etdiyi bu Oyunlar ölkəmizin qonaqpərvərliyini, təhlükəsizliyini və müasir infrastrukturunu nümayiş etdirdi. İdmançılarımızın bu yarışlarda komanda hesabında ikinci yerə layiq görülməsi Azərbaycan idmanının rəqabət qabiliyyətini bir daha təsdiqlədi.

Prezident İlham Əliyev bu il ölkəmizdə ilk dəfə keçirilən UFC beynəlxalq turnirini də əlamətdar hadisə kimi dəyərləndirdi. Dünyanın ən populyar idman yarışlarından biri olan UFC-nin Bakıda keçirilməsi Azərbaycanın artıq qlobal idman mərkəzlərindən birinə çevrildiyini göstərir. Bu turnir vasitəsilə ölkəmiz dünya mediasının diqqət mərkəzində oldu və Azərbaycanın müasir, inkişaf etmiş dövlət imici daha da möhkəmləndi.

Formula 1 yarışlarının da ölkəmizin tanıdılmasında mühüm rol oynadığı qeyd edildi. Prezidentin vurğuladığı kimi, bu yarışlardan sonra ölkəmizə gələn xarici turistlərin sayında ciddi artım müşahidə olunmuşdur. 2025-ci ildə keçirilən Formula 1 yarışının bütün biletlərinin əvvəlcədən satılması, on minlərlə tamaşaçının canlı iştirakı və yarım milyardlıq qlobal auditoriya Azərbaycanın dünyaya təqdimatı baxımından mühüm göstəricidir. Bu yarışlar həm turizmin inkişafına, həm də ölkənin beynəlxalq nüfuzunun güclənməsinə xidmət edir.

Dövlət başçısı gələcək perspektivlərdən danışarkən Xizək üzrə Dünya Kubokunun Şahdağda keçirilməsini xüsusi vurğuladı. Bu tədbir Azərbaycanın qış idmanları sahəsində də mövqelərinin möhkəmləndiyini göstərir. Şahdağ Xizək Kurortunun inkişafı, yeni trasların istifadəyə verilməsi, hotellərin və xidmət sahələrinin genişlənməsi regionun sosial-iqtisadi inkişafına mühüm töhfə verir və minlərlə insan üçün yeni iş imkanları yaradır.

Prezident İlham Əliyev Bakı şəhərinin “Dünyanın İdman Paytaxtı” seçilməsini Azərbaycanın idman sahəsində əldə etdiyi nailiyyətlərin beynəlxalq səviyyədə tanınması kimi dəyərləndirdi. Bu nüfuzlu ad ölkəmizin idman siyasətinə verilən yüksək qiymətin göstəricisidir. Dövlət başçısı idmançıların və idman mütəxəssislərinin əməyinin daim qiymətləndirilməsinin vacibliyini vurğulayaraq bildirdi ki, Azərbaycanın idman şöhrətini ucaldan insanlar hər zaman dövlətin diqqət və qayğısı ilə əhatə olunmalıdır.

Prezident İlham Əliyevin 2025-ci ilin idman yekunlarına həsr olunmuş çıxışı bir daha sübut etdi ki, Azərbaycan idmanı güclü dövlət dəstəyi, sağlam gənclik və milli birlik üzərində qurularaq davamlı inkişaf yolunu seçmişdir. Bu yol ölkəmizin idman arenasında və beynəlxalq miqyasda mövqelərini daha da möhkəmləndirəcək.
Xocalı rayon ziyalısı Leyli Yusifova