Ana dili insanın ilk eşitdiyi səs, ilk öyrəndiyi söz və ilk ifadə etdiyi hisslərin dilidir. Azərbaycan xalqı üçün ana dili yalnız ünsiyyət vasitəsi deyil, milli ruhun, tariximizin, mədəniyyətimizin və dövlətçiliyimizin daşıyıcısıdır. Məhz buna görə də hər il 1 avqust ölkəmizdə Azərbaycan əlifbası və Azərbaycan dili günü kimi böyük qürur hissi ilə qeyd olunur.

Azərbaycan dili minilliklər boyu formalaşaraq zəngin inkişaf yolu keçmişdir. Xalqımızın yaratdığı dastanlar, bayatılar, nağıllar, aşıq sənəti və klassik ədəbiyyat nümunələri dilimizin nə qədər zəngin olduğunu göstərir. Bu dil xalqımızın mənəvi dünyasının aynasıdır.

Müstəqil Azərbaycanın dövlət dili olan Azərbaycan dili bu gün bütün dövlət qurumlarında, təhsil müəssisələrində, elm və mədəniyyət sahələrində geniş istifadə edilir. Müasir informasiya texnologiyalarında Azərbaycan dilinin tətbiqinin genişlənməsi onun inkişafı üçün yeni imkanlar yaratmışdır.

Azərbaycan əlifbasının latın qrafikası əsasında formalaşdırılması müasir dövrün tələblərinə uyğun mühüm addım olmuşdur. Bu islahat milli irsimizin qorunmasına, dünya elmi və informasiya məkanına inteqrasiyaya, həmçinin Azərbaycan dilində elektron resursların hazırlanmasına böyük təkan vermişdir.

Bu gün ana dilimizin qorunması hər bir ailədən başlayır. Valideynlər övladlarında ana dilinə sevgi hissi formalaşdırmalı, məktəblər isə ədəbi dil normalarının düzgün öyrədilməsinə xüsusi diqqət yetirməlidirlər. Kitab oxumaq, klassik və müasir Azərbaycan ədəbiyyatı ilə tanış olmaq dilimizin zənginliyini daha dərindən mənimsəməyə kömək edir.

Dil xalqın milli təhlükəsizliyinin, mənəvi bütövlüyünün və dövlətçiliyinin əsas dayaqlarından biridir. Ana dilinə hörmət edən xalq öz tarixini, mədəniyyətini və milli kimliyini də qoruyub saxlayır.

1 Avqust – Azərbaycan əlifbası və Azərbaycan dili günü hər birimiz üçün ana dilimizə ehtiramın, milli dəyərlərimizə bağlılığın və gələcək nəsillər qarşısında məsuliyyətimizin ifadəsidir. Gəlin Azərbaycan dilini sevək, onun saflığını qoruyaq, düzgün danışaq və yazaq. Çünki dilimizi qorumaq Vətənimizi qorumağın ən müqəddəs yollarından biridir.

Xocalı raron gənci Mahnur Məmmədov.