Prezident İlham Əliyevin 8 dekabr 2025-ci il tarixində Slovakiyaya rəsmi səfəri və mətbuata verdiyi bəyanat Azərbaycan diplomatiyasının Avropa istiqamətində uğurla davam edən siyasətinin daha bir mühüm mərhələsi kimi dəyərləndirilir. Bu səfər, yalnız ikitərəfli münasibətlərin mövcud vəziyyətini təsdiqləməklə kifayətlənmədi, eyni zamanda gələcək əməkdaşlığın əsas istiqamətlərini də aydın şəkildə müəyyənləşdirdi. Dövlət başçısının verdiyi mesajlar Azərbaycanın Avropa dövlətləri ilə bərabərhüquqlu və praqmatik əməkdaşlıq modelinə sadiq qaldığını göstərdi.

Prezident İlham Əliyev çıxışında vurğuladı ki, Azərbaycan–Slovakiya münasibətləri artıq siyasi etimad mərhələsini çoxdan keçib və real iqtisadi, enerji və nəqliyyat layihələri ilə möhkəmlənməkdədir. Son illər ərzində qarşılıqlı səfərlərin artması, hökumətlərarası komissiyaların fəaliyyəti və biznes dairələri arasında yaranan sıx təmaslar münasibətlərin dinamik xarakter aldığını sübut edir. Tərəflər yalnız bu günü deyil, qarşıdakı onillikləri əhatə edən uzunmüddətli tərəfdaşlıq xəttini əsas məqsəd kimi müəyyən ediblər.

Enerji sahəsində əməkdaşlıq mətbuat bəyanatında aparıcı mövzulardan biri kimi ön plana çıxıb. Azərbaycan Avropa bazarına etibarlı enerji resursları çatdıran ölkə kimi mövqeyini getdikcə möhkəmləndirir. Prezident İlham Əliyevin çıxışında qeyd olundu ki, qaz hasilatının artırılması, yeni yataqların istismara verilməsi və mövcud enerji infrastrukturlarının genişləndirilməsi Avropanın enerji təhlükəsizliyinə davamlı töhfə verir. Slovakiya ilə bu istiqamətdə əlaqələrin genişləndirilməsi isə strateji əməkdaşlığın əsas dayaqlarından biri kimi qiymətləndirilir.

Dövlət başçısı Azərbaycanın iqtisadi və sosial inkişaf modelinə də xüsusi diqqət ayırdı. Bildirildi ki, ölkədə həyata keçirilən ardıcıl islahatlar, sənayeləşmə siyasəti və regionların hərtərəfli inkişafı Azərbaycanın investisiya mühitini xeyli yaxşılaşdırıb. Slovakiya şirkətləri üçün də sənaye parkları, nəqliyyat-logistika layihələri, kənd təsərrüfatı və bərpa olunan enerji sahələrində geniş imkanlar mövcuddur. Bu potensialın reallaşdırılması isə iki ölkə arasında iqtisadi əməkdaşlığa yeni dinamika gətirə bilər.

Prezident İlham Əliyevin çıxışında siyasi dialoqun gələcək inkişafı da xüsusi vurğulandı. Slovakiya Prezidentinin Azərbaycana rəsmi səfərə dəvət olunması iki ölkə arasında münasibətlərin daha da yüksək səviyyəyə qalxacağının göstəricisi kimi dəyərləndirilir. Bu cür siyasi təmaslar yalnız dövlətlərarası əlaqələri deyil, eyni zamanda parlamentlərarası əməkdaşlığı, humanitar münasibətləri və cəmiyyətlərarası əlaqələri də gücləndirir.

Prezident İlham Əliyevin Slovakiyada səsləndirdiyi fikirlər bir daha onu göstərdi ki, Azərbaycan öz xarici siyasətində balanslı mövqeyini qoruyur, regional sabitliyə töhfə verir və Avropa məkanı ilə konstruktiv əməkdaşlığı davam etdirir. Bu səfər və mətbuata verilən bəyanat Azərbaycan–Slovakiya münasibətlərinin yalnız bu gününü deyil, həm də strateji baxımdan gələcəyini müəyyən edən mühüm siyasi addım kimi dəyərləndirilir.

Xocalı rayon ziyalısı Elxan Zamanov