Azərbaycan-Ermənistan münasibətlərində yeni mərhələ – sülhə doğru tarixi dönüş.
Prezident İlham Əliyevin Əbu-Dabidəki çıxışının əsas mövzularından biri Azərbaycan və Ermənistan arasında formalaşmaqda olan sülh prosesinin əhəmiyyəti idi. Dövlət başçısı qeyd etdi ki, iki ölkə 30 ildən artıq müddətdə müharibə şəraitində yaşasa da, artıq altı aydır sülh mühitinə daxil olub. Bu fakt regionun gələcəyi baxımından tarixi dönüş kimi qiymətləndirilə bilər.

Vaşinqtonda ABŞ Prezidenti Donald Trampın ev sahibliyi ilə keçirilən üçtərəfli Zirvə Görüşü bu prosesdə mühüm rol oynadı. Zirvə görüşünün nəticəsi olaraq sülh sazişinin paraflanması və Birgə Bəyannamənin imzalanması onilliklər boyu davam edən qanlı münaqişənin başa çatdırılması istiqamətində həlledici addım oldu. Prezident İlham Əliyevin sözləri ilə desək, Azərbaycan müstəqillik qazandıqdan sonra ilk dəfədir ki, sülh şəraitində yaşamağı öyrənir.

Sülhün yalnız siyasi bəyanatlarla deyil, konkret addımlarla möhkəmləndirilməsi xüsusi diqqət çəkir. Azərbaycan ərazisindən Ermənistana yük daşımalarına qoyulan məhdudiyyətlərin aradan qaldırılması, həmçinin neft məhsullarının ixracına başlanılması qarşılıqlı etimadın formalaşmasına xidmət edir. Bu addımlar regionda iqtisadi inteqrasiyanın əsasını qoymaqla yanaşı, gələcək əməkdaşlıq üçün real zəmin yaradır.

Prezident İlham Əliyev vurğuladı ki, uzunmüddətli münaqişələrə, qarşılıqlı etimadsızlığa və ağır xatirələrə baxmayaraq, sülh mümkündür. Bunun üçün güclü siyasi iradə və beynəlxalq dəstək vacibdir. Azərbaycanın nümayiş etdirdiyi mövqe göstərir ki, sabitlik və inkişaf üçün dialoqdan başqa alternativ yoxdur.

Əbu-Dabidə keçirilən mükafatlandırma mərasiminin rəmzi əhəmiyyəti də diqqətəlayiqdir. Məhz bu şəhərdə Vaşinqton sammitindən bir ay əvvəl son danışıqlar raundu keçirilmiş və sülhə aparan razılaşma əldə olunmuşdur. Bu fakt BƏƏ-nin də regionda sülhün təşviqinə verdiyi töhfəni göstərir.

Nəticə etibarilə, Azərbaycan-Ermənistan münasibətlərində başlanmış yeni mərhələ yalnız iki ölkə üçün deyil, bütövlükdə Cənubi Qafqazın təhlükəsizliyi və rifahı üçün ümidverici perspektivlər açır. Əgər bu proses ardıcıl şəkildə davam etdirilərsə, region uzun illərdən sonra sabitlik və əməkdaşlıq məkanına çevrilə bilər.
Xocalı rayon gənci Kənan Qulıyev.