Azərbaycanın Mərkəzi Asiya ölkələri ilə münasibətləri son illərdə sürətlə inkişaf edərək strateji tərəfdaşlıq səviyyəsinə yüksəlib. Prezident İlham Əliyevin Türkmənbaşı şəhərində keçirilən 8-ci Məşvərət görüşündə çıxışı bu münasibətlərin həm siyasi, həm də iqtisadi baxımdan yeni məzmun qazandığını göstərdi. Azərbaycanın bu formatın tamhüquqlu üzvü olması isə regionlararası əməkdaşlığın imkanlarını daha da genişləndirir.

Bu gün Azərbaycan və Mərkəzi Asiya dövlətlərini birləşdirən əsas istiqamətlərdən biri qarşılıqlı iqtisadi maraqlardır. Ticarət dövriyyəsinin sürətli artımı, investisiyaların genişlənməsi və birgə investisiya fondlarının yaradılması tərəflərin uzunmüddətli iqtisadi tərəfdaşlığa üstünlük verdiyini göstərir. İndi əsas məqsəd mövcud imkanları daha səmərəli istifadə etməklə birgə istehsal və sənaye layihələrinin sayını artırmaqdır.

Nəqliyyat və logistika sahəsində isə yeni imkanlar daha geniş perspektivlər vəd edir. Xəzər dənizi Azərbaycanla Mərkəzi Asiyanı birləşdirən mühüm nəqliyyat arteriyasına çevrilir. Azərbaycanın liman, dəmir yolu və avtomobil infrastrukturlarına yatırdığı investisiyalar Orta Dəhlizin imkanlarının genişlənməsinə şərait yaradır. Bu marşrutun inkişafı həm Azərbaycan, həm də Mərkəzi Asiya ölkələri üçün dünya bazarlarına çıxışın şaxələndirilməsi baxımından mühüm əhəmiyyət daşıyır.

Energetika sahəsində əməkdaşlıq da yeni mərhələyə daxil olur. Azərbaycan Mərkəzi Asiyanın enerji resurslarının beynəlxalq bazarlara çıxarılmasında mühüm rol oynayır. Eyni zamanda, bərpaolunan enerji və yaşıl enerji dəhlizlərinin yaradılması istiqamətində birgə layihələr regionun gələcək enerji potensialını daha da artırır.

Bu tərəfdaşlığın mühüm xüsusiyyətlərindən biri də qarşılıqlı həmrəylikdir. Mərkəzi Asiya ölkələrinin Azərbaycanın işğaldan azad edilmiş ərazilərində məktəb, mədəniyyət və digər obyektlər inşa etməsi xalqlarımız arasındakı qardaşlıq münasibətlərinin əyani ifadəsidir. Bu layihələr siyasi və iqtisadi əməkdaşlığı mənəvi bağlarla tamamlayır.

Türkmənbaşı görüşünün əsas mesajlarından biri budur ki, Azərbaycan və Mərkəzi Asiya artıq bir-birini yalnız yaxın tərəfdaş kimi deyil, vahid regional əməkdaşlıq məkanının mühüm iştirakçıları kimi görür. Nəqliyyat, enerji, investisiya və rəqəmsal layihələrin bir-birini tamamlaması bu əlaqələrin gələcəkdə daha da dərinləşəcəyini göstərir. Azərbaycanın fəal regional siyasəti isə bu prosesdə ölkəmizin rolunu və əhəmiyyətini daha da artırır.