28 May – Müstəqillik Günü Azərbaycan xalqının tarixində milli qürur, dövlətçilik və azadlıq salnaməsinin ən parlaq səhifələrindən biridir. 1918-ci il mayın 28-də Azərbaycan xalqı Şərqdə və müsəlman dünyasında ilk demokratik, hüquqi və dünyəvi parlament respublikasını – Azərbaycan Xalq Cümhuriyyətini yaradaraq dünya tarixində mühüm bir hadisəyə imza atdı. Bu böyük tarixi nailiyyət xalqımızın yüksək siyasi düşüncəsinin, milli oyanışının və azad yaşamaq əzminin bariz nümunəsi idi.

Azərbaycan Xalq Cümhuriyyətinin yaradılması təkcə ölkəmiz üçün deyil, bütün müsəlman Şərqi üçün yeni siyasi mərhələnin başlanğıcı oldu. Çətin və mürəkkəb tarixi şəraitdə yaradılan bu dövlət qısa müddət ərzində demokratik idarəçilik ənənələrinin əsasını qoydu, milli dövlət quruculuğu istiqamətində mühüm addımlar atdı. Milli Şura tərəfindən qəbul olunan İstiqlal Bəyannaməsi Azərbaycanın müstəqil dövlət olduğunu bütün dünyaya bəyan etdi və xalqımızın dövlətçilik tarixində yeni bir dövr açdı.

Azərbaycan Xalq Cümhuriyyəti mövcud olduğu 23 ay ərzində mühüm dövlətçilik ənənələri formalaşdırdı. İlk parlament və hökumət yaradıldı, dövlət atributları təsis edildi, milli ordu quruldu, vətəndaşlıq institutu formalaşdırıldı. Demokratik prinsiplərə əsaslanan Cümhuriyyət bütün vətəndaşlara bərabər hüquqlar verdi, irqi, dini və milli ayrı-seçkiliyi aradan qaldırdı. Qadınlara seçki hüququnun verilməsi isə həmin dövr üçün olduqca mütərəqqi addım idi və Azərbaycanı bir çox Avropa dövlətlərindən belə irəli aparırdı.

Xalq Cümhuriyyəti dövründə təhsil, elm və mədəniyyət sahəsində də mühüm işlər görüldü. Tədrisin ana dilində aparılması haqqında qərar qəbul olundu, Bakı Dövlət Universiteti yaradıldı və milli maarifçilik hərəkatı daha da gücləndirildi. Hüquq-mühafizə və ədliyyə sisteminin formalaşdırılması, məhkəmə orqanlarının yaradılması hüquqi dövlət quruculuğunun əsas istiqamətlərindən biri idi. Eyni zamanda, Azərbaycanın beynəlxalq aləmdə tanınması və diplomatik əlaqələrinin genişləndirilməsi istiqamətində də mühüm addımlar atıldı.

1920-ci ildə bolşevik işğalı nəticəsində Azərbaycan Xalq Cümhuriyyətinin fəaliyyəti dayandırılsa da, xalqımızın müstəqillik arzusu heç vaxt sönmədi. Azərbaycan xalqı öz milli dövlətçilik ideyalarına sadiq qalaraq azadlıq mübarizəsini davam etdirdi və nəhayət, 1991-ci ildə dövlət müstəqilliyini yenidən bərpa etdi. Müstəqilliyini bərpa edən Azərbaycan Respublikası özünü Azərbaycan Xalq Cümhuriyyətinin siyasi və hüquqi varisi elan etdi.

Ulu Öndər Heydər Əliyevin hakimiyyətə qayıdışından sonra Azərbaycanda dövlət müstəqilliyinin qorunması və möhkəmləndirilməsi istiqamətində mühüm addımlar atıldı. Məhz onun uzaqgörən siyasəti nəticəsində ölkədə ictimai-siyasi sabitlik təmin edildi, milli dövlətçilik ənənələri inkişaf etdirildi və Azərbaycanın beynəlxalq nüfuzu artdı. Ümummilli Liderin təşəbbüsü ilə üçrəngli dövlət bayrağımız yenidən ucaldıldı və xalqımızın milli birliyinin rəmzinə çevrildi.

Bu gün Prezident İlham Əliyevin rəhbərliyi ilə Azərbaycan Respublikası sürətlə inkişaf edən, güclü və nüfuzlu dövlət kimi dünya birliyində öz layiqli yerini tutur. Ölkəmizdə demokratik dövlət quruculuğu, iqtisadi inkişaf və sosial rifah istiqamətində mühüm nailiyyətlər əldə olunub. Azərbaycanın ərazi bütövlüyünün və suverenliyinin tam bərpa olunması isə xalqımızın milli iradəsinin, dövlətimizin gücünün və birliyinin ən böyük təcəssümüdür.

Bu gün işğaldan azad olunmuş torpaqlarımızda üçrəngli bayrağımızın dalğalanması Azərbaycan Xalq Cümhuriyyətinin ideallarının yaşadığını və müasir Azərbaycanın həmin müqəddəs irsə sadiqliyini nümayiş etdirir. 28 May – Müstəqillik Günü yalnız tarixi bir hadisənin ildönümü deyil, həm də xalqımızın azadlıq ruhunun, dövlətçilik ənənələrinin və milli həmrəyliyinin təntənəsidir.

Azərbaycan xalqı öz şanlı dövlətçilik tarixini daim qürurla yaşayır və gələcək nəsillərə ötürür. Müstəqilliyimizin qorunması, daha da möhkəmləndirilməsi və Azərbaycanın güclü dövlət kimi inkişafı hər bir vətəndaşın müqəddəs borcudur. Çünki müstəqillik xalqımızın ən böyük sərvəti, Azərbaycan dövlətinin isə ən möhkəm dayağıdır. Yaşasın müstəqil Azərbaycan!