7 oktyabr 2025-ci ildə Qəbələdə keçirilən Türk Dövlətləri Təşkilatının Dövlət Başçıları Şurasının 12-ci Zirvə Görüşü tarixə həm siyasi, həm də mənəvi baxımdan mühüm bir hadisə kimi yazıldı. Prezident İlham Əliyevin çıxışı türk dünyasının gücünü, həmrəyliyini və gələcəyə olan inamını bir daha nümayiş etdirdi. Dövlət başçısı çıxışına Qırğız Respublikasına sədrliyə görə təşəkkür edərək başladı və qeyd etdi ki, bu gün Türk Dövlətləri Təşkilatı sadəcə əməkdaşlıq platforması deyil, artıq beynəlxalq səviyyədə öz sözünü deyən, ciddi geosiyasi mərkəzə çevrilib. O, Azərbaycanın təşkilatın Katibliyinə 2 milyon ABŞ dolları məbləğində ianə köçürdüyünü bildirərək, bunun Türk birliyinə dəstəyin bariz nümunəsi olduğunu vurğuladı. İlham Əliyev çıxışında qeyd etdi ki, türk dövlətlərini birləşdirən əsas amil ortaq tarix, dil, mədəniyyət və mənəvi dəyərlərdir. Onun sözlərinə görə, bu birliyi qorumaq və gücləndirmək hər bir ölkənin tarixi borcudur. Prezident sülh və təhlükəsizliyin hər bir dövlətin inkişafının təməli olduğunu bildirərək, TDT-nin Naxçıvan Sazişinə əsaslanan prinsiplərinin bu baxımdan xüsusi əhəmiyyət daşıdığını vurğuladı. O, dünyanın dəyişən geosiyasi şəraitində türk dövlətlərinin birləşərək vahid güc mərkəzi kimi çıxış etmələrinin vacibliyini qeyd etdi. İlham Əliyev çıxışında hərbi və müdafiə əməkdaşlığının gücləndirilməsini xüsusi önəmli məsələ kimi qiymətləndirdi. O, Türkiyə ilə birgə keçirilən 25-dən çox hərbi təlimi xatırladaraq 2026-cı ildə Azərbaycanda Türk Dövlətləri Təşkilatına üzv ölkələrin birgə hərbi təlimlərinin keçirilməsini təklif etdi. Prezident dedi ki, hərbi güc hər bir ölkənin müstəqilliyini və ərazi bütövlüyünü qoruyan əsas sütundur. O, 2020-ci ildə 44 günlük Vətən müharibəsində qazanılmış Zəfəri və 2023-cü ildə həyata keçirilmiş antiterror tədbirlərini xatırladaraq bildirdi ki, Azərbaycanın ərazi bütövlüyü tam bərpa olunub, suverenlik isə tam təmin edilib. İlham Əliyev bu tarixi nailiyyəti yalnız Azərbaycanın deyil, bütövlükdə türk dünyasının qələbəsi kimi dəyərləndirdi. Prezident həmçinin Vaşinqtonda imzalanan Azərbaycan-Ermənistan sülh sazişinin Cənubi Qafqazda sülh və sabitlik üçün yeni səhifə açdığını qeyd etdi. İlham Əliyev çıxışında nəqliyyat və enerji məsələlərinə də xüsusi diqqət yetirdi. O bildirdi ki, Azərbaycan Şərq-Qərb və Şimal-Cənub nəqliyyat dəhlizlərinin kəsişməsində yerləşərək regionun əsas tranzit mərkəzinə çevrilib. Ölkəmiz Orta Dəhliz boyunca yükdaşımaları 90 faiz artırıb və bu istiqamətdə mühüm logistika layihələri həyata keçirir. Zəngəzur dəhlizinin açılması isə türk dünyasını birləşdirən yeni strateji marşrut olacaq. Prezident vurğuladı ki, enerji təhlükəsizliyi də regionun sabitliyi üçün əsas faktordur. Azərbaycan hazırda 14 ölkəyə qaz ixrac edir və bu sahədə etibarlı tərəfdaş kimi tanınır. Bununla yanaşı, ölkəmiz bərpaolunan enerji sahəsinə böyük sərmayələr yatırır və 2030-cu ilə qədər enerji istehsalının 40 faizinin yaşıl mənbələrdən təmin olunacağını hədəfləyir. İlham Əliyev çıxışında qeyd etdi ki, Azərbaycan qardaş ölkələrin iqtisadiyyatına 20 milyard dollardan çox sərmayə yatırıb və bu, türk ölkələri arasında iqtisadi inteqrasiyanın möhkəmlənməsinə xidmət edir. Prezident çıxışının sonunda 1926-cı ildə Bakıda keçirilmiş birinci Türkoloji Qurultayın 100 illiyinin gələn il Türk Dövlətləri Təşkilatı çərçivəsində təntənəli şəkildə qeyd edilməsini təklif etdi. O, həmçinin Qarabağ və Şərqi Zəngəzurun bərpasında qardaş ölkələrin göstərdiyi yardımı minnətdarlıqla xatırladı. Prezident qeyd etdi ki, Füzuli, Ağdam və Cəbrayılda qardaş türk xalqları tərəfindən tikilən məktəblər, məscidlər və infrastruktur layihələri türk birliyinin canlı simvoludur. İlham Əliyev çıxışını bu sözlərlə yekunlaşdırdı: “Azərbaycan xalqı bu qardaş dəstəyini heç vaxt unutmayacaq.” Onun bu nitqi bir daha sübut etdi ki, Azərbaycan Türk dünyasının həmrəyliyinə, sülhə və ortaq gələcəyə sadiqdir və ölkəmiz türk birliyinin möhkəmlənməsində aparıcı rola malikdir

Xocalı rayon gənci Afərim Lətifli