Azərbaycan Prezidenti İlham Əliyevin Türkmənbaşı şəhərində keçirilən Azərbaycan və Mərkəzi Asiya Dövlət Başçılarının 8-ci Məşvərət görüşündə çıxışı ölkəmizin region dövlətləri ilə münasibətlərində yeni mərhələnin formalaşdığını göstərdi. Azərbaycanın bu formatda tamhüquqlu üzv kimi iştirakı siyasi və iqtisadi əlaqələrin daha geniş platformada inkişafına imkan yaradır.

Bu gün Azərbaycanla Mərkəzi Asiya ölkələri arasında münasibətlər qarşılıqlı etimad və ortaq maraqlar üzərində qurulur. Artan ticarət dövriyyəsi, qarşılıqlı investisiyalar və yaradılan birgə investisiya fondları iqtisadi əməkdaşlığın perspektivlərinin böyük olduğunu göstərir. Qarşıdakı əsas hədəflərdən biri yalnız ticarət əlaqələrini genişləndirmək deyil, birgə istehsal müəssisələri yaratmaq və dünya bazarlarına birlikdə çıxmaqdır.

Nəqliyyat sahəsi isə bu tərəfdaşlığın ən mühüm istiqamətlərindən biridir. Azərbaycanın Xəzər üzərindən Mərkəzi Asiyanı Avropa bazarları ilə birləşdirən mövqeyi ölkəmizin Orta Dəhlizdə rolunu daha da artırır. Artan tranzit yükdaşımalar marşrutun əhəmiyyətinin yüksəldiyini göstərir. Paralel olaraq, rəqəmsal bağlantıların inkişafı və fiber-optik layihələr regionlararası əlaqələrin yeni texnoloji mərhələyə keçməsinə şərait yaradır.

Energetika da Azərbaycan-Mərkəzi Asiya əməkdaşlığının strateji sütunlarından biridir. Türkmənistan və Qazaxıstanın enerji resurslarının Azərbaycan üzərindən dünya bazarlarına çıxarılması ilə yanaşı, yaşıl enerji sahəsində Azərbaycan, Qazaxıstan və Özbəkistanın birgə təşəbbüsləri gələcək üçün mühüm imkanlar açır.

Münasibətlərin gücü yalnız iqtisadi rəqəmlərlə ölçülmür. Mərkəzi Asiya ölkələrinin Azərbaycanın işğaldan azad edilmiş ərazilərinin bərpasında iştirakı xalqlarımız arasında qardaşlıq bağlarının real nümunəsidir. Füzuli və Ağdamda həyata keçirilən təhsil və mədəniyyət layihələri bu həmrəyliyin gələcək nəsillərə ötürülməsinə xidmət edir.

Türkmənbaşı görüşü bir daha göstərdi ki, Azərbaycan və Mərkəzi Asiya ölkələri arasında əməkdaşlıq artıq ayrı-ayrı sahələrlə məhdudlaşmır. Siyasi, iqtisadi, nəqliyyat, enerji və humanitar istiqamətləri birləşdirən bu tərəfdaşlıq regionun gələcək inkişafında mühüm rol oynayacaq. Azərbaycan isə əlverişli coğrafi mövqeyi və artan iqtisadi imkanları ilə bu prosesin əsas iştirakçılarından biri kimi çıxış edir.