Azərbaycan xalqının müasir dövlətçilik tarixindən danışarkən Ümummilli Lider Heydər Əliyevin xidmətlərini xüsusi qeyd etmək lazımdır. Onun rəhbərliyi ilə həyata keçirilən dövlət quruculuğu siyasəti müstəqil Azərbaycanın gələcək inkişaf istiqamətlərini müəyyən etmişdir. Bu istiqamətdə atılan ən mühüm addımlardan biri 1995-ci ildə ölkəmizin ilk milli Konstitusiyasının qəbul edilməsi olmuşdur.

Azərbaycan müstəqilliyini bərpa etdikdən sonra yeni siyasi və hüquqi sistemin yaradılmasına böyük ehtiyac var idi. Ölkənin Əsas Qanunu müstəqil dövlətimizin maraqlarını, xalqımızın milli dəyərlərini və müasir dövrün tələblərini əks etdirməli idi. Ulu Öndər Heydər Əliyev bu məsələyə xüsusi diqqət yetirərək Konstitusiya layihəsinin hazırlanmasına bilavasitə rəhbərlik etmişdir.

1995-ci il noyabrın 12-də keçirilən ümumxalq səsverməsi nəticəsində qəbul olunan Konstitusiya Azərbaycan dövlətçiliyinin inkişafında tarixi hadisəyə çevrildi. Bu sənəddə dövlət hakimiyyətinin təşkili, hakimiyyət bölgüsü, vətəndaşların hüquq və azadlıqları, dövlətin əsas prinsipləri öz əksini tapdı.

Ulu Öndərin milli dövlətçilik sahəsində xidmətlərindən biri də Azərbaycan dilinin hüquqi statusunun qorunması ilə bağlıdır. Hələ 1978-ci ildə onun təşəbbüsü ilə Azərbaycan SSR Konstitusiyasında Azərbaycan dili dövlət dili kimi təsbit edilmişdi. Həmin dövrün siyasi şəraiti nəzərə alındıqda bu qərarın milli kimliyimizin qorunması baxımından nə qədər əhəmiyyətli olduğu daha aydın görünür.

Bu gün Prezident İlham Əliyevin rəhbərliyi ilə həyata keçirilən dövlət siyasətində də Konstitusiyanın aliliyi və dövlətçilik ənənələrinin davam etdirilməsi mühüm yer tutur. Ölkəmizin müstəqilliyinin möhkəmləndirilməsi, suverenliyinin təmin olunması və hüquqi dövlət quruculuğunun inkişafı bu siyasətin əsas istiqamətlərindəndir.

Konstitusiya Günü münasibətilə keçdiyimiz tarixi yola nəzər salarkən bir daha anlayırıq ki, müstəqil dövlət qurmaqla yanaşı, onun möhkəm hüquqi əsaslarını yaratmaq da böyük əhəmiyyət daşıyır. Ulu Öndər Heydər Əliyevin rəhbərliyi ilə qəbul edilmiş Konstitusiyamız məhz bu baxımdan xalqımızın mühüm tarixi nailiyyətlərindən biridir.