Azərbaycan xalqının çoxəsrlik dövlətçilik tarixində 28 May xüsusi və əlamətdar bir gündür. 1918-ci il mayın 28-də xalqımız Şərqdə və müsəlman dünyasında ilk demokratik parlament respublikasını – Azərbaycan Xalq Cümhuriyyətini yaradaraq milli azadlıq və müstəqillik idealını gerçəyə çevirdi. Bu tarixi hadisə Azərbaycan xalqının milli iradəsinin, azadlıq əzminin və yüksək siyasi təfəkkürünün təntənəsi idi. Azərbaycan Xalq Cümhuriyyətinin yaradılması ilə xalqımız öz taleyinin sahibi olduğunu bütün dünyaya nümayiş etdirdi və dövlətçilik tariximizin yeni, şərəfli mərhələsinin əsası qoyuldu.



Azərbaycan Xalq Cümhuriyyəti mürəkkəb ictimai-siyasi şəraitdə yaranmasına baxmayaraq, fəaliyyət göstərdiyi qısa müddət ərzində mühüm nailiyyətlər əldə etdi. Milli Şura tərəfindən qəbul edilən İstiqlal Bəyannaməsi Azərbaycanın müstəqilliyini rəsmən elan etdi və xalqımızın milli dövlətçilik ənənələrinin davamlılığını təmin etdi. Cümhuriyyətin əsas məqsədi azad, demokratik və hüquqi dövlət qurmaq idi. Bu məqsədlə parlament yaradıldı, hökumət formalaşdırıldı, dövlət atributları təsis olundu, milli ordu quruldu və hüquqi islahatlar həyata keçirildi.



Azərbaycan Xalq Cümhuriyyəti xalq hakimiyyəti və demokratik dəyərlərə əsaslanan dövlət modeli yaratdı. Bütün vətəndaşlara milli, dini və sosial mənsubiyyətindən asılı olmayaraq bərabər hüquqlar verildi. Qadınlara seçki hüququnun tanınması həmin dövr üçün çox mühüm və mütərəqqi addım idi. Bu fakt bir daha sübut edirdi ki, Azərbaycan Xalq Cümhuriyyəti demokratik idarəçilik prinsiplərinə sadiq olan müasir dövlət idi.



Cümhuriyyət dövründə elm, təhsil və mədəniyyət sahəsində də mühüm işlər görüldü. Təhsilin ana dilində aparılması ilə bağlı qərarlar qəbul olundu, milli maarifçilik inkişaf etdirildi və Bakı Dövlət Universitetinin yaradılması ilə milli kadr hazırlığının əsası qoyuldu. Eyni zamanda, məhkəmə və ədliyyə orqanlarının təşkili hüquqi dövlət quruculuğunda mühüm rol oynadı. Xarici siyasət sahəsində isə Azərbaycanın beynəlxalq aləmdə tanınması və diplomatik əlaqələrinin qurulması istiqamətində mühüm addımlar atıldı.



Azərbaycan Xalq Cümhuriyyəti cəmi 23 ay fəaliyyət göstərsə də, onun yaratdığı dövlətçilik ənənələri xalqımızın yaddaşında əbədi yaşadı. 1920-ci ildə Azərbaycan sovet işğalına məruz qalsa da, xalqımız heç zaman azadlıq ideallarından vaz keçmədi. XX əsrin sonlarında Azərbaycan yenidən müstəqillik qazandı və 1991-ci ildə qəbul edilən “Azərbaycan Respublikasının dövlət müstəqilliyi haqqında” Konstitusiya Aktı ilə müasir Azərbaycan Respublikasının Azərbaycan Xalq Cümhuriyyətinin varisi olduğu rəsmən təsbit edildi.



Müstəqilliyin ilk illərində ölkədə yaranmış ağır siyasi və iqtisadi vəziyyət dövlətçiliyimiz üçün ciddi təhlükələr yaradırdı. Məhz belə bir dövrdə xalqın tələbi ilə hakimiyyətə qayıdan Ulu Öndər Heydər Əliyev Azərbaycan dövlətçiliyini məhv olmaq təhlükəsindən xilas etdi. Onun uzaqgörən siyasəti nəticəsində ölkədə sabitlik bərpa olundu, milli birlik möhkəmləndi və müstəqil dövlət quruculuğu prosesi uğurla davam etdirildi. Ulu Öndər hər zaman vurğulayırdı ki, müstəqilliyi qoruyub saxlamaq onu əldə etməkdən daha çətindir.



Bu gün Prezident İlham Əliyevin rəhbərliyi ilə Azərbaycan Respublikası sürətlə inkişaf edən, güclü və nüfuzlu dövlətə çevrilmişdir. Ölkəmiz siyasi, iqtisadi və hərbi sahələrdə böyük uğurlar qazanmış, beynəlxalq aləmdə öz mövqeyini daha da möhkəmləndirmişdir. Azərbaycanın ərazi bütövlüyünün və dövlət suverenliyinin tam bərpa olunması isə xalqımızın milli həmrəyliyinin və dövlətimizin gücünün ən böyük göstəricisidir. Bu gün işğaldan azad edilmiş torpaqlarımızda üçrəngli dövlət bayrağımızın dalğalanması Azərbaycan Xalq Cümhuriyyətinin müqəddəs ideallarının yaşadığını və əbədi olduğunu göstərir.



28 May – Müstəqillik Günü Azərbaycan xalqının şərəf və qürur günüdür. Bu gün biz Azərbaycan Xalq Cümhuriyyətinin qurucularını böyük ehtiramla yad edir, onların dövlətçilik irsini yaşatmağı özümüzə mənəvi borc hesab edirik. Müstəqil Azərbaycan dövləti bu gün öz gücü, siyasi nüfuzu və milli birliyi ilə regionun lider dövlətlərindən birinə çevrilib. Xalqımız əmindir ki, Azərbaycan bundan sonra da müstəqillik yolunda inamla addımlayacaq, dövlətçiliyimiz daha da möhkəmlənəcək və üçrəngli bayrağımız daim yüksəklərdə dalğalanacaq.

Xocalı rayon ziyalısı Leyli Yusifova