25 iyun 2026-cı il tarixində Narkotik Vasitələrin Qanunsuz Dövriyyəsinə Qarşı Mübarizə üzrə Xocalı Rayon Komissiyası tərəfindən 26 iyun – “Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü” münasibətilə maarifləndirici tədbir təşkil olunub.

Qarabağ Regional Gənclər və İdman İdarəsinin Xocalı rayonu üzrə Gənclər və İdman sektorunun təşkilatçılığı ilə keçirilən tədbirin əsas məqsədi gənclər arasında narkomaniyanın yaratdığı təhlükələr barədə məlumatlılığın artırılması, sağlam həyat tərzinin təbliği və zərərli vərdişlərə qarşı mübarizənin gücləndirilməsi olub.

Tədbiri giriş sözü ilə açan Xocalı rayonu üzrə Gənclər və İdman sektorunun müdiri Elməddin Bağırov narkomaniyanın cəmiyyət üçün ciddi təhlükə mənbəyi olduğunu vurğulayaraq, gənclərin bu bəladan qorunmasında maarifləndirmə tədbirlərinin mühüm əhəmiyyət daşıdığını bildirib.

Daha sonra Xocalı Rayon Polis Şöbəsinin əməkdaşı çıxış edərək narkotik vasitələrin qanunsuz dövriyyəsinə qarşı aparılan mübarizə tədbirləri, narkotiklərin insan sağlamlığına və cəmiyyətə vurduğu zərərlər barədə ətraflı məlumat verib. Digər natiqlər də çıxışlarında narkomaniyanın sosial, psixoloji və hüquqi fəsadlarından bəhs edərək iştirakçıları bu təhlükəli vərdişdən uzaq olmağa çağırıblar.

Tədbir çərçivəsində iştirakçılarla mövzu ətrafında fikir mübadiləsi aparılıb, onları maraqlandıran suallar cavablandırılıb və narkomaniyaya qarşı mübarizənin hər bir vətəndaşın üzərinə düşən mühüm vəzifələrdən biri olduğu diqqətə çatdırılıb.

Sonda qeyd olunub ki, gənclərin sağlam, bilikli və vətənpərvər ruhda formalaşması istiqamətində belə maarifləndirici tədbirlərin keçirilməsi gələcəkdə də davam etdiriləcəkdir.