Xocalı Rayon İcra Hakimiyyətinin təşkilatçılığı ilə Beynəlxalq Sülh Aylığı çərçivəsində rayonun ümumtəhsil müəssisələrində silsilə maarifləndirici tədbirlər keçirilmişdir.

Tədbirlərin keçirilməsində əsas məqsəd məktəblilər arasında sülh, əmin-amanlıq, qarşılıqlı hörmət və tolerantlıq dəyərlərinin təbliği, gənc nəslin sülh mədəniyyəti və humanist prinsiplər barədə məlumatlandırılması, həmçinin münaqişələrin sülh yolu ilə həllinin əhəmiyyətinin diqqətə çatdırılması olmuşdur.

Tədbirlər zamanı ümumtəhsil müəssisələrində şagirdlərlə görüşlər keçirilmiş, onlarla mövzu ətrafında maarifləndirici söhbətlər aparılmışdır. Görüşlərdə sülhün qorunmasının cəmiyyətin inkişafında mühüm rol oynadığı, insanlar və xalqlar arasında qarşılıqlı anlaşma, hörmət və əməkdaşlığın möhkəmləndirilməsinin vacibliyi vurğulanmışdır.

Şagirdlərə beynəlxalq səviyyədə sülh və təhlükəsizliyin təmin olunması istiqamətində həyata keçirilən tədbirlər, sülh mədəniyyətinin formalaşdırılmasının əhəmiyyəti barədə məlumat verilmişdir. Eyni zamanda, gənc nəslin sülhə, ədalətə, insan hüquqlarına və humanizm prinsiplərinə hörmət ruhunda tərbiyə olunmasının vacibliyi qeyd edilmişdir.

Görüşlər zamanı şagirdlərin mövzu ilə bağlı fikirləri dinlənilmiş, onları maraqlandıran suallar cavablandırılmış və sülhün gündəlik həyatda, ailədə, məktəbdə və cəmiyyətdə qarşılıqlı münasibətlərin əsas prinsiplərindən biri olduğu diqqətə çatdırılmışdır.

Tədbirlər çərçivəsində şagirdlərə ölkəmizdə sülh və sabitliyin qorunması, dövlətlər və xalqlar arasında dostluq və əməkdaşlıq münasibətlərinin inkişaf etdirilməsinin əhəmiyyəti barədə də məlumat verilmişdir. Bildirilmişdir ki, sülh yalnız münaqişələrin və müharibələrin olmaması deyil, eyni zamanda insanların bir-birinə hörmət etdiyi, hüquq və azadlıqların qorunduğu, qarşılıqlı anlaşma və əməkdaşlığın mövcud olduğu mühitin formalaşdırılmasıdır.

Maarifləndirici tədbirlər zamanı məktəblilərin fəal iştirakı təmin edilmiş, onların sülh və həmrəyliklə bağlı düşüncələri dinlənilmişdir. Şagirdlərə sülhün qorunmasına öz töhfələrini verə biləcək davranış və yanaşmalar barədə tövsiyələr verilmişdir.

Beynəlxalq Sülh Aylığı çərçivəsində keçirilən bu tədbirlər gənc nəslin sülh, tolerantlıq, humanizm və qarşılıqlı hörmət dəyərləri əsasında maarifləndirilməsinə, onların dünyagörüşünün genişləndirilməsinə və cəmiyyətdə sülh mədəniyyətinin təşviqinə xidmət etmişdir.

Xocalı Rayon İcra Hakimiyyəti tərəfindən bu istiqamətdə həyata keçirilən maarifləndirici tədbirlərin gələcəkdə də davam etdirilməsi, xüsusilə məktəblilər arasında sülh və həmrəylik ideyalarının təbliğinin genişləndirilməsi nəzərdə tutulur.